सोमबार, जेठ १२, २०७७

समाचार

संविधानसभा सदस्य धर्मप्रसाद घिमिरे भारतमा मृत भेटिए

1583223616Ghimire.jpg

काठमाडौं- तत्कालीन संविधानसभा सदस्य धर्मप्रसाद घिमिरे भारतमा मृत भेटिएका छन्।

झापाका पुराना कम्युनिष्ट नेतासमेत रहेका घिमिरे पश्चिम बङ्गालको बागडोग्रामा मृत भेटिएका हुन्।

६५ वर्षीय घिमिरे बागडोग्राको प्रहरी कार्यालय नजिक मंगलबार बिहान मृत अवस्थामा भेटिएको इलाका प्रहरी कार्यालय काँकडभिट्टाका प्रहरी नायब उपरीक्षक राजेन्द्र पोखरेलले जानकारी दिए।

झापाको मेचीनगर–१३ दुहागढी घर भएका घिमिरेले केही वर्षदेखि डिप्रेसनको औषधि सेवन गरिरहेको पारिवारिक स्रोतले जनाएको छ।

घिमिरे तीन दिनअघि दाह्री काट्न भनेर घर नजिकैको चारआली बजार जान्छु भनेर निस्केपछि सम्पर्कविहीन भएको प्रहरीले जनाएको छ। मृतकका भाइ नरेन्द्रले शव पहिचान गरेको प्रहरीले जनाएको छ।

भारतीय प्रहरीले घिमिरेको मृत्यु गाडीको ठक्करबाट भएको जानकारी दिएको प्रहरीले जनाएको छ। ठक्कर दिने गाडीको भने पहिचान नभएको भारतीय प्रहरीले जनाएको छ।

घिमिरे २०६४ सालको संविधानसभा चुनावमा झापा क्षेत्र नं १ मा तत्कालीन नेकपा माओवादीका तर्फबाट निर्वाचित भएका थिए।

घिमिरेले झापा विद्रोहपछि ९ वर्ष जेल जिवन बिताएका थिए। घिमिरे नख्खु जेल ब्रेक गर्ने माध्येका एक हुन्।

प्रतिक्रिया दिनुहोस्