काठमाडौं- सहिद स्मारक ए डिभिजन लिग फुटबलमा संकटा क्लबले पहिलो जित निकालेको छ।
शनिबार दशरथ रंगशालामा भएको खेलमा संकटाले न्युरोड टिम एनआरटीविरुद्ध १–० गोलको जित निकालेको हो।
संकटाका लागि दिपेश आले मगरले निर्णायक गोल गरे। संकटाले खेलको नवौं मिनेटमा अग्रता बनाएको थियो। त्यसपछि प्राप्त भएका पटकपटकका मौकामा कुनै गोल हुन सकेन। पहिलो गोल नै निर्णायक बन्न पुग्यो।
यो जितपछि संकटाले तालिकामा तीन अंक जोडेको छ। एनआरटीको दुई खेलमा पहिलो हार ब्यहोरेको छ।
पहिलो खेलमा एनआरटीले सरस्वतीलाई हराएको थियो।