दुई लाख घुस लिएको आरोपमा वडाध्यक्ष र लेखनदास पक्राउ

काठमाडौं – सेवाग्राहीबाट दुई लाख रुपैयाँ घुस लिएको आरोपमा नवलपरासीको रामग्राम नगरपालिका–१८ का वडा अध्यक्ष गोपाल डिस्वा मगर र लेखनदास रविन्द्रप्रसाद यादवलाई अख्तियारले नियन्त्रणमा लिएको छ।

सेवाग्राहीको नाता प्रमाणित, घरगोठ बाटो प्रमाणित र सेवा टहल तथा औषधि उपचारको सिफारिस गरिदिएवापत बिना रसिद दुई लाख लिएको उजुरीका आधारमा दुबै जनालाई नियन्त्रणमा लिइएको अख्तियारले जनाएको छ।

लिइएको रकमको रसिद माग गर्दासमेत नदिएको भन्ने उजुरी तथा संकलित प्रमाणको आधारमा अख्तियार दुरुपयोग अनुसन्धान आयोगको बुटवल कार्यालयको टोलीले वडा अध्यक्ष मगरलाई स्थानीय होली चाइल्ड स्कुल नजिकबाट र लेखनदास यादवलाई मालपोत कार्यालबाट नियन्त्रणमा लिई अनुसन्धान भैरहेको प्रवक्ता प्रदीपकुमार कोइरालाले जानकारी दिए।