संगठन विस्तारमा सीके राउत सक्रिय, मधेशका सबै जिल्लामा आमसभा गर्ने

काठमाडौं- सीके राउत नेतृत्वको जनमत पार्टीले पूर्वको झापाबाट पश्चिमको कञ्चनपुरसम्म आम सभा गर्ने भएको छ।

केन्द्रीय समिति बैठकले पूर्वदेखि पश्चिमसम्मका सबै तराई–मधेसका जिल्लामा आमसभा गर्ने निर्णय गरेको हो । बैठकले आमसभाको कार्यतालिकासमेत तयार गरेको छ।

आमसभा पुष ७ गतेबाट फागुन १७ सम्मको हुने अध्यक्ष राउतद्वारा जारी विज्ञप्तिमा उल्लेख छ। संगठन विस्तार र आफ्ना एजेन्डा जनतासमक्ष पुर्याउने काममा आमसभा केन्द्रित हुने जनाइएको छ ।

छुट्टै मधेश प्रदेशको माग गर्दै आन्दोलन गरिराखेका सिके राउत सरकारसँग भएको सहमतिपछि दल दर्ता गराएर गएको उपनिर्वाचनमा सहभागी भएका थिए ।

उनको पार्टी जनमतबाट महोत्तरी जिल्लाको पिपरा गाउँपालिकाको अध्यक्ष पदमा अञ्जनीदेवी मण्डलले उम्मेदवारी दिएकी थिइन् । उनी पराजित भइन् ।

उपनिर्वाचनमा भाग लिएका राउत आगमी निर्वाचनमा देशभर उम्मेद्वारी दिने र तराई मधेशमा पकड बलियो बनाउने तयारीमा जुटेको छ ।

राउत गत फागुनमा शान्तिपूर्ण राजनीतिमा आएका थिए। उनले वैशाखमा विगतका संगठन विघटन गरी जनमत पार्टी निर्वाचन आयोगमा दर्ता गराएका थिए।

उनको पार्टी जनमतले मंसिर ७ गते काठमाडौंमा आमसभा गरेको थियो।