विद्याको शपथ ग्रहण कांग्रेसद्वारा बहिस्कार

काठमाडौं– हालै सम्पन्न उपनिर्वाचनमा कास्की क्षेत्र नम्बर दुईबाट निर्वाचित प्रतिनिधिसभा सदस्य विद्या भट्टराईको शपथ ग्रहण कार्यक्रमलाई प्रमुख प्रतिपक्षी दल नेपाली कांग्रेसका सांसदहरुले बहिस्कार गरेका छन्।

उपसभामुखले सांसदलाई शपथ गराउने अधिकार संविधानले नदिएको भन्दै कांग्रेसका सांसदहरुले शपथ ग्रहण बहिस्कार गरेका हुन्।

संविधानको धारा ९१ (४)मा सभामुखको अनुपस्थितिमा उपसभामुखले बैठकको अध्यक्षता गर्ने व्यवस्थामात्रै छ। त्यसबाहेक उपसभामुखको अधिकार तथा कर्तव्यबारे संविधान मौन रहेकोले शपथ ग्रहण नै असंवैधानिक भएको कांग्रेसका सांसदहरुले तर्क गरेका छन्।

‘उपसभामुखले शपथ गराउनु संविधानमा नभएको अधिकार प्रयोग गर्नु हो,’ कांग्रेस सांसद देवेन्द्रराज कँडेलले भने। यसैगरी, संघीय संसद् सचिवालयबाट शपथ ग्रहणका विषयमा सांसदहरुलाई सूचनासमेत नआएको कांग्रेसकै सांसदहरुले जनाएका छन्।

सांसद डिला संग्रौलाले आफूलाई शपथ ग्रहण कार्यक्रमको विषयमा सचिवालयबाट सूचना नआएकोले सहभागी नभएको बताइन्।