छाया श्रममन्त्रीको प्रश्न– पोलमा प्रधानमन्त्रीको फोटो टाँसेर जनताले रोजगारी पाउँछन् ?

काठमाडौं– नेपाली कांग्रेसकी नेतृ तथा छाया सरकारकी श्रममन्त्री डा. डिला संग्रौलाले सरकारलाई १४ वटा प्रश्न गरेकी छन्। पत्रकार सम्मेलन गरेरै उनले सरकारले श्रम तथा रोजगारसँग सम्बन्धित प्रश्न गरेकी हुन्।

मलेसिया, जापानलगायत देशमा नेपाली श्रमिकहरु निःशुल्क जान पाउने भनिए पनि अहिलेसम्म कार्यान्वयन नभएको, यूएईमा पनि शून्य लागतमा श्रमिक जान पाउने समझदारी गरिए पनि त्यसबाट अहिलेसम्म नेपाली श्रमिकहरु लाभान्वित नभएको, श्रम स्वीकृति लिने प्रक्रियालाई झन् झण्झटिलो बनाइएको, वैदेशिक रोजगारमा जाने श्रमिकहरुको सुरक्षाबारे सरकार उदासिन रहेको उनको आरोप छ।

त्यसैगरी संग्रौलाले सामाजिक सुरक्षा कोषको विषयमा पनि प्रश्न उठाएकी छन् । अहिलेसम्म ११ हजार रोजगारदाता कम्पनीमात्रै सामाजिक सुरक्षा कोषमा आवद्ध रहेको भन्दै उनले यो कार्यक्रम असफल भएको दाबी गरिन् । उनले प्रश्न गरिन्, ‘सामाजिक सुरक्षा कोषलाई सफल बनाउन सरकारले अब के गर्छ ?’

प्रधानमन्त्री रोजगार कार्यक्रम पनि असफल भएको भन्दै उनले सरकारलाई आगामी रणनीतिबारे प्रश्न गरेकी छन् ।

डा. संग्रौलाले श्रम, रोजगार तथा सामाजिक सुरक्षामन्त्री रामेश्वर राय यादवलाई भेटेर सरकारले चालेका श्रमसम्बन्धी विभिन्न योजनामाथि आफूले प्रश्न उठाएको उनले बताइन्। श्रममन्त्रीलाई ज्ञापनपत्र बुझाएपछि सिंहदरबारस्थित नेपाली कांग्रेस संसदीय दलको कार्यालयमा पत्रकार सम्मेलन गरेकी संग्रौलाले सरकारले प्रधानमन्त्री रोजगार कार्यक्रमको दुरुपयोग गरेको दाबी गरिन्।

सरकारले गर्ने कामको श्वेतपत्र जारी गर्नुपर्ने उनको भनाइ थियो । ‘प्रधानमन्त्री रोजगार कार्यक्रमको दुरुपयोग भयो। योजना र लक्ष्यअनुसार कार्यन्वयन भएन। बाटो सफा गर्ने र बाँदर धपाउने किन दुरुपयोग गरेको ?’ उनले प्रश्न गरिन्।

संग्रौलाले सामाजिक सुरक्षा कोषको दुरुपयोग गरी पोलपोलमा प्रधानमन्त्रीको फोटो टाँसेकोमा पनि आपत्ति प्रकट गरिन्। सामाजिक सुरक्षा कोष कांग्रेस सरकारले सुरु गरेको उनले दाबी गरिन्।