सोमबार, चैत २४, २०७६

समाचार

सूर्यविनायक–जडिबुटी सडकमा नयाँ लेन नियम, कम होला त ट्राफिक जाम ?

1582868020IMG_0603.jpg

काठमाडौं– सूर्यविनायक–जडिबुटी ६ लेन सडक खण्डमा यात्रुवाहक, मालवाहक र कम गतिमा गुड्ने सवारीसाधन बायाँ लेन र निजी तथा साना सवारीसाधन दाहिने लेनबाट मात्र चलाउने नयाँ व्यवस्था लागू गरेको छ।

भक्तपुर जिल्लाका प्रमुख जिल्ला अधिकारी हुमकला पाण्डे र महानगरीय ट्राफिक प्रहरी महाशाखाका प्रमुख भिम प्रसाद ढकालले सूर्यविनायकमा एक कार्यक्रमबीच रिवन काटेर यो व्यवस्थाको शुरूवात गरेका थिए ।

सडक दुर्घटना न्यूनीकरणसँगै सडकमा रहेको लेनलाई अनुशासित एवं व्यवस्थित रुपमा पालना गराउन, सवारी आवागमनलाई सहजता ल्याउन र ट्राफिक नियम पालनाको प्रवृत्ति बसाउन उक्त नियम लागू गरिएको महाशाखाका प्रमुख प्रहरी वरिष्ठ उपरीक्षक ढकालले जानकारी दिए ।

देशकै पहिलो ६ लेन सडकमा लेन अनुशासन पालना नहुँदा मासिक २०० को हाराहारीमा सडक दुर्घटना बढेपछि महाशाखाले उक्त लेन अनुशासन कडाइका साथ लागू गरेको हो । ७ किमी लम्बाइ भएको उक्त सडक खण्डमा प्रतिमिनेट ५१ वटा मोटरसाइकल र २३ वटा ४ पाङ्ग्रे सवारी साधन गुड्ने गर्छन् ।

महाशाखाका प्रवक्ता प्रहरी उपरीक्षक जिवन कुमार श्रेष्ठले भने, ‘सडकमा लेन हुँदा पनि सवारी चालकहरूले सही लेन प्रयोग नगरेको र लेन परिवर्तन गर्दा पनि लापरवाहीका साथ गरेकाले सडक दुर्घटना भएको छ । सवारी दुर्घटना न्यूनीकरण गरी उक्त सडकलाई नमुना बनाउन लेन अनुशासन नियम कार्यान्वयनमा ल्याइएको हो ।’

धुलिखेल–सिन्धुली–बर्दिबास सडक भई पूर्वी नेपालतर्फ जाने सवारी साधनहरू यही सडक भएर गुड्छन् र यही सडक भएर राजधानी पनि भित्रिन्छन् । यस सडकमा सवारीसाधनको चाप दिनानुदिन बढिरहेको छ । छिमेकी चीनसँगको व्यापारिक नाका तातोपानी खुलेपछि यो सडकमा अझै सवारी साधनको चाप बढ्ने निश्चित छ ।

ढकालका अनुसार यस ६ लेनको सडकमा लेनअनुसार सवारी साधनहरू गुडाउनको लागि निर्माण गरिएको हो र यस नियमको कार्यान्वयन पश्चात्दैशकै नमुना र उदारणीय सडकखण्ड हुनेछ । यसका लागि सम्पूर्ण सडक प्रयोकर्ताहरूले नियम पालना र सरोकारवाला निकायहरूलाई आवश्यक सहयोग र समन्वयका लागि अनुरोध समेत गरे ।

प्रचारप्रसारको लागि १० हजार पर्चा पम्पलेट

सबै नागरिकहरूलाई लेन प्रयोगसम्बन्धी जानकारीका लागि १० हजारभन्दा बढी पर्चा पम्पलेट वितरण गरेसँगै ८० वटा जानकारीमूलक बोर्डहरू राखिएका छन् । उक्त सडकखण्डको ७ वटा चोकमा लेन प्रयोगसम्बन्धी नयाँ नियमको प्ला कार्ड बोकेर ट्राफिक प्रहरी पनि उभिने गरेका छन्।

महाशाखाका प्रमुख ढकालले भने, ‘हाललाई उक्त नियम पालनाको लागि प्रहरी नायव उपरीक्षकको कमान्डमा ट्राफिक प्रहरी र जनपद प्रहरीको थप टोली खटाई सम्झाईवुझाई गरिएको छ । सडक सुरक्षा र त्यसको प्रयोगमा सम्बन्धमा स्थानीय तह लगायत अन्य सरोकारवाला निकायहरूलाई जिम्मेवारपूर्ण बनाई यस नियमलाई कडाईका साथ पालना गराईनेछ।’

केही समय पश्चात नियम नमान्ने सवारी साधनलाई ट्राफिक प्रहरीले १५ सयसम्म जरिवाना गर्न सक्नेछ र सोभन्दा बढी यातायात व्यवस्था कार्यालयमार्फत कारबाही हुने उनले बताए ।

सरोकारवाला सबैलाई राखेर शुरू हरिएको यो अभियानको अनुगमन र प्रभावकारी कार्यान्वयनमा सघाउका लागी सम्बन्धित सरोकारवाला संघसंस्था, नागरिक समाजबाट प्रतिनिधित्व हुने गरी ६ सदस्य अनुगमन समिति समेत गठन पनि गरिएको छ।

पछिल्लो समय उपत्यकाको सवारी आवागमनलाई थप सहज एव प्रभावकारी बनाउन स्थलगत रूपमा समस्याको पहिचान गरी ठाउँको ठाउँ कार्यान्वयनको लागि मसाशाखाका प्रहरी उपरीक्षक जिवन कुमार श्रेष्ठको अध्यक्षतामा गठित सुझाव समितिले सुझाव पेश गरेको थियो।

प्रतिक्रिया दिनुहोस्