बुधबार, चैत २६, २०७६

समाचार

ओलीबाहेकका नेताहरु गोप्य छलफलमा, के पाक्दैछ प्रचण्ड निवासमा ?

1582862946Prachanda_niwas.jpg

काठमाडौं- वामदेव गौतमलाई राष्ट्रियसभा सदस्यमा सिफारिस नगर्ने प्रधानमन्त्रीे केपीशर्मा ओलीको चेतावनीपछि ओलीबाहेकका शीर्ष नेताहरु गोप्य छलफलमा जुटेका छन् ।

प्रचण्ड निवास खुमलटारमा अहिले प्रचण्डसहित माधव नेपाल, झलनाथ खनाल, वामदेव गौतम, नारायणकाजी श्रेष्ठलगायतका नेताहरु छलफलमा रहेको खुमलटार स्रोतले जनाएको छ ।

सुरुमा प्रचण्ड निवासमा झलनाथ खनाल पुगेका थिए। त्यसपछि माधव नेपाल पुगेका छन्। करिब एक घन्टादेखि चलेको छलफलमा पार्टीमा पछिल्लो समय बढेको विवादको विषयमा छलफल भइराखेको छ ।

ओलीले वामदेवलाई राष्ट्रियसभा सदस्यमा सिफारिस नगरे के गर्ने भन्ने रणनीति बनाउन ओलीबाहेकका नेताहरु खुमलटारमा भेला भएको स्रोतको दावी छ ।

उनीहरु सचिवालय बैठकले गरेको निर्णय बमोजिम वामदेवलाई राष्ट्रियसभामा सिफारिस नगरे ओलीविरुद्ध कडा रुपमा प्रस्तुत हुने तयारीमा छन् ।

अध्यक्ष प्रचण्ड, नेता नेपाल र खनाल वामदेव गौतमलाई जसरी हुन्छ राष्ट्रियसभा सदस्य बनाउनु पर्ने अडानमा छन् ।

तर, प्रधानमन्त्रीसमेत रहेका अर्का अध्यक्ष ओली भने वामदेवलाई राष्ट्रियसभा सदस्य बनाउन चाहिराखेका छैनन् । उनी अर्थमन्त्री युवराज खतिवडालाई नै राष्ट्रियसभाको मनोनित सदस्यमा निरन्तरता दिन चाहिराखेका छन् ।

बुधबार बसेको सचिवालय बैठकले भने वामदेवलाई राष्ट्रियसभा सदस्यमा सिफारिस गर्न प्रधानमन्त्रीलाई निर्देशन दिने निर्णय गरेको थियो । तर, प्रधानमन्त्रीले भने निर्णय भएको एक घण्टापछि वामदेवलाई राष्ट्रियसभामा लान नसक्ने प्रतिक्रिया दिएका थिए ।

प्रतिक्रिया दिनुहोस्