'सामाजिक सुरक्षा कोषको नियमावली संशोधन गर'

काठमाडौं– बैंक तथा वित्तीय संस्थाका छाता संगठनहरुले नेपाल राष्ट्र बैंकलाई सामाजिक सुरक्षा कोषको नियमावली परिवर्तन गर्नका लागि पहल गर्न आग्रह गर्दै पत्र लेखेका छन् ।

सोमबार नेपाल बैंकर्स संघ, विकास बैकर्स संघ र नेपाल वित्तीय संस्था संघले संयुक्त रुपमा राष्ट्र बैंकका गभर्नरलाई पत्र लेखी आफ्ना असहमतिका विषय सम्बोधन हुने गरी सामाजिक सुरक्षा कोषले आफ्नो विनियमावलीमा संशोधन गर्नका लागि राष्ट्र बैंकले पहल गरिदिन आग्रह गरेका हुन् ।

गत मंसिर २४ गते नेपाल राष्ट्र बैंकले बैंक तथा वित्तीय संस्थाको नाममा सूचना जारी गरी सामाजिक सुरक्षा कोषमा आवद्ध हुन निर्देशन दिएको थियो । त्यसलगत्तै नेपाल वित्तीय संस्था कर्मचारी संघले विज्ञप्ति जारी गरी हालकै कार्यविधि अनुसार बैंकका कर्मचारीहरु कोषमा आवद्ध नहुने जनाएका थिए।

वित्तीय संस्थाका छाता संगठनहरुले १५ वर्ष लगातार कोषमा रकम जम्मा गरेपछि आफूले चाहेको अवस्थामा रकम निकाल्न पाउनुपर्ने,  जम्मा भएको रकम निकाल्दा १५ प्रतिशत आयकर लगाउने व्यवस्था हटाउनुपर्ने, सरकारी र निजी क्षेत्रका कर्मचारीहरुलाई समान व्यवहार हुनुपर्ने, पेन्सनको लागि ६० वर्ष कुर्नुपर्ने व्यवस्था हटाउनुपर्ने, कर्मचारी संचय कोष तथा नागरिक लगानी कोषबाट पाउने सहुलियतपूर्ण ऋण सुविधाको व्यवस्था गर्नुपर्ने लगायतका विभिन्न मागहरुको उचित सम्बोधनका लागि पहल गर्न गभर्नरलाई आग्रह गर्दै पत्र बुझाएका हुन् ।