काठमाडौं– वरिष्ठ नेता रामचन्द्र पौडेल समूहले केन्द्रीय समिति बैठक बहिस्कार गरेपछि कांग्रेस सभापति शेरबहादुर देउवाले कृष्णप्रसाद सिटौला समूहसँग वार्ता गर्दैछन्।
सभापति देउवाको प्रतिनिधित्व गर्दै उपसभापति बिमलेन्द्र निधिले पौडेल समूहसँग नेता प्रकाशमान सिंहको निवास चाक्सीबारीमा वार्ता गरेको थियो। उक्त वार्तामा सहमति हुन नसक्दा पौडेल समूहले आजको केन्द्रीय समिति बैठक बहिस्कार गरेको हो।
दिउँसो १ बजे बस्ने भनिएको केन्द्रीय समिति बैठकमा पौडेल समूह सहभागी नहुँदा बैठक सुरु हुन सकेको छैन। तर, नेता कृष्णप्रसाद सिटौला भने पार्टी कार्यालय पुगेका छन्।
सिटौला समूहलाई फकाउन सभापति देउवा, उपसभापतिद्वय निधि र विजयकुमार गच्छदार लगायतले वार्ता गर्दैछन्। पार्टी कार्यालयमा सिटौला र देउवा पक्षबीच वार्ता सम्पन्न भएपछि मात्र आजको केन्द्रीय समिति बैठक बस्ने अथवा नबस्ने निष्कर्षमा पुगिनेछ।