विहीबार, चैत २७, २०७६

संवाद

प्रधानमन्त्रीले के भन्नुभएको हो हामी उहाँबाटै सुन्छौं : झलनाथ खनाल

1582790588jhalnath.jpg

सत्तारूढ नेकपा सचिवालय बैठकले उपाध्यक्ष वामदेव गौतमलाई राष्ट्रियसभा सदस्यमा मनोनयनका लागि सिफारिस गर्ने निर्णय गरेको छ।

प्रधानमन्त्रीसमेत रहेका अध्यक्ष केपी शर्मा ओलीले सचिवालयको उक्त निर्णय नमान्ने अडान लिएका छन्। ओली वर्तमान अर्थमन्त्री युवराज खतिवडालाई राष्ट्रियसभामा निरन्तरता दिनुपर्ने पक्षमा उभिएका छन्।

प्रधानमन्त्री ओली पार्टी सचिवालय निर्णयविरुद्ध उभिएपछि नेकपाभित्र एक किसिमको तरंग उत्पन्न भएको छ। यसै विषयमा केन्द्रित रहेर नेकपा वरिष्ठ नेता झलनाथ खनालसँग गरिएको संक्षिप्त कुराकानी :

अब कसरी अगाडि बढ्ने?

पार्टीले विवेकपूर्ण र सुझबुझपूर्ण ढंगले निर्णय गरेको छ। ती निर्णय हामी सबैले पालना गर्नुपर्छ। हामीसँग त्यसको विकल्प छैन।

प्रधानमन्त्रीले मान्दिनँ भन्नुभएको छ नि?

उहाँले भनेको कुरा मैले सुनको छैन। पत्रपत्रिका/सञ्चारमाध्यमले व्यापक बाहिर ल्याएका छन्। अब हामी बैठक बस्छौं। उहाँले के भन्न खोज्नुभएको हो, त्यो सुन्छौं।

प्रधानमन्त्रीका कुरा नसुन्ने भन्ने हुँदैन। तर पार्टीले गरेको निर्णय सर्वोपरि हुन्छ। त्यो प्रधानमन्त्रीका लागि पनि हुन्छ, मन्त्रीहरूका लागि पनि हुन्छ, सिंगो पार्टीका लागि हुन्छ। त्यसैले पार्टी निर्णयलाई सबैले सर्वोपरि रूपमा लिएर लागू गर्नुपर्छ।

उहाँले नमाने के हुन्छ ?

अहिले उहाँले मान्दिनँ भन्नुभएको छैन। त्यसैले अहिल्यै हाइपोथेसिसका आधारमा कुरा गर्नु हुँदैन। मान्नुभएन भने के गर्ने भन्ने पार्टीले जानिहाल्छ नि!

सचिवालय बैठकमा गौतमका बारेमा निर्णय गर्दा प्रधानमन्त्रीले सजिलै स्वीकार्नु भएको थियो?

बैठकमा हामी सबैका तर्फबाट वामदेव गौतम राष्ट्रियसभामा जानुपर्छ भन्ने कुरा उठ्यो। हामी सबैले वामदेव कमरेडलाई राष्ट्रियसभा लैजाऔं भन्यौं। त्यसमा सहमति भयो। प्रधानमन्त्रीको पनि सहमति भयो। सर्वसम्मत निर्णय भएको हो ।

उहाँले त सर्वसम्मत निर्णय भएको भन्नुभएको छैन नि?
कसले के भन्यो वा भनेन भन्ने कुरा निर्णायक होइन, पार्टीले कसरी निर्णय गर्‍यो भन्ने महत्त्वपूर्ण हो। पार्टी प्रवक्ताले नै सर्वसम्मत निर्णय भएको बताउनुभएको तपाईंले सुन्नुभएन र?

 

प्रतिक्रिया दिनुहोस्