काठमाडौं- सरकारले गरेको समायोजन प्रक्रिया असन्तुष्ट शाखा अधिकृतहरुले सिंहदरबारभित्र प्रदर्शन गरेका छन्।
असन्तुष्ट अधिकृतहरुले आइतबार संघीय मामिला तथा सामान्य प्रशासन मन्त्रालयमा उभिएर विरोध गरेपछि मन्त्रालयका प्रशासन महाशाखा प्रमुखसहसचिव बाबुराम अधिकारीलाई विरोधपत्र बुझाएका छन्।
असन्तुष्ट अधिकृतहरुले आफूहरुलाई समायोजन गरेको ९ महिना नपुग्दै लोक सेवा आयोगले ठूलो मात्रामा अधिकृतका लागि विज्ञापन खुलाएकोमा असन्तुष्टि व्यक्त गरेका छन्। लोक सेवा आयोगले गत मंसिर २५ गते करिब ११ सय अधिकृत भर्नाका लागि विज्ञापन आह्वान गरेको थियो।
उनीहरुले मन्त्रालयमा विरोध पत्र बुझाउँदै संघमा खाली रहेको दरबन्दीमा आफूहरुलाई समायोजन गर्न मागसमेत गरेका छन्।
उनीहरुले निजामति किताव खानाको रेकर्डमा संघमा ८८ जना अधिकृतको मात्रै दरबन्दी खाली रहेको देखिएको तर लोक सेवाले ठूलो संख्यामा नयाँ भर्नाको विज्ञापन गरेको प्रति आश्चर्य व्यक्त गरेका छन्।
साथै यति ठूलो संख्यामा खाली दरबन्दी भए आफूहरुलाई रोजेको ठाउँमा किन नपठाएको भन्ने प्रश्न उनीहरुले विरोध पत्रमार्फत् संघीय मामिला तथा सामान्य प्रशासन मन्त्रालयलाई सोधेका छन्।
अधिकृतहरुले समायोजनका कारण आफूहरु जुनियरको मातहतमा बसेर काम गर्नुपर्ने अवस्था रहेको र अब लोक सेवाले लिने भर्नापछि यो समस्या झनै विकराल बन्ने उनीहरुको तर्क छ।
विरोधमा ब्याच ३०, ३१, ३२ र ३३ का शाखा अधिकृतहरु उपस्थित भएका थिए।