भोलिबाट अझै चिसो बढ्ने, यस्तो हुनेछ तीन दिनको मौसम

काठमाडौं– धुम्मिएको आकाश खुलेसँगै भोलि (सोमबार)बाट न्यूनतम तापक्रम अझै घट्ने भएको छ ।

पश्चिमी वायुको प्रभावका कारण देशका अधिकांश ठाउँको आकाशमा बादल लागेको थियो । आज (आइतबार) साझबाट बादल हट्ने र मौसम सफा हुने मौसमविद् समिर श्रेष्ठले जानकारी दिए ।

उनका अनुसार मौसम सफा भएपछि न्यूनतम तापक्रम अझै घट्ने छ । आकाश सफा हुँदा शित पर्ने भएकाले बिहान बेलुका अझै चिसो बढ्न सक्ने उनले बताए ।

अहिले काठमाडौं उपत्यकाको न्यूनतम तापक्रम ८ डिग्री सेल्सियस छ । अधिकतम तापक्रम १६ देखि १८ सम्म पुग्नसक्ने मौसम पूर्वानुमा महाशाखाले जनाएको छ । अधिकांश उच्च हिमाली क्षेत्रको तापक्रम माइनसभन्दा तल झरेको छ।

पश्चिमी वायुको प्रभावका कारण शुक्रबार र शनिबार देशका उच्च पहाडी र हिमाली क्षेत्रमा भारी हिमपात भएको थियो भने पहाडी र तराई क्षेत्रमा वर्षा भएको थियो । हिमपात र वर्षासँगै चिसो बढेको छ।

आइतबार देशको पूर्वी क्षेत्रमा वर्षा र हिमपातको सम्भावना रहेको मौसमविद् श्रेष्ठले जानकारी दिए । उनका अनुसार काठमाडौं उपत्यकामा छिटपुट वर्षा हुनसक्ने सम्भावना छ भने पूर्वी क्षेत्रमा मध्यम वर्षा हुनेछ ।

आगामी तीन दिनको मौसम पूर्वानुमान

मंसीर २९ गते (आइतबार)

दिउँसो: देशको अधिकांश भू-भागहरुमा सामान्य बदली रहने छ । देशको पश्चिमी भू-भागका थोरै स्थानहरुमा तथा मध्य र पूर्वी पहाडी भू-भागको १ /२ स्थानहरुमा हल्का वर्षा हुने संभावना छ। हिमाली भू-भागहरुमा हल्का देखि मध्यम हिमपात हुने संभावना छ।

राति: देशको पहाडी भू-भागमा आंशिकदेखि सामान्य बदली रहि बाँकी भू-भागमा आंशिक बदली रहनेछ । हिमाली भू-भागहरुमा हल्का हिमपात हुने संभावना छ।

मंसीर ३० गते (सोमबार)

दिउँसो: देशको पहाडी भू-भागमा आंशिक बदली रही अधिकांश भू-भागमा मौसम सामान्यतया सफा रहनेछ।

राति: देशको पहाडी भू-भागमा आंशिक बदली रहि अधिकांश भू-भागमा मौसम सामान्यतया सफा रहनेछ।

पौष १ गते (मंगलबार)

दिउँसो: देशको केहि पहाडी भू-भागमा आंशिक बदली रहि अधिकांश भू-भागमा मौसम सामान्यतया सफा रहनेछ।

राति: देशको केहि पहाडी भू-भागमा आंशिक बदली रहि अधिकांश भू-भागमा मौसम सामान्यतया सफा रहनेछ।