देउवा सुटुक्क पुगे पौडेल निवास

काठमाडौं - नेपाली कांग्रेसका सभापति शेरबहादुर देउवा र उपसभापति विमलेन्द्र निधिले शनिबार बरिष्ठ नेता रामचन्द्र पौडेलसँग भेटवार्ता गरेका छन्। सभापति देउवा र निधि पौडेललाई भेट्न उनको निवास बोहराटार पुगेका थिए।

भेटवार्ताका क्रममा पार्टी सहमति र सहकार्यमा संचालन गर्नुपर्ने बारे छलफल भएको नेता पौडेलले जानकारी दिएका छन्। देउवा र पौडेलबीच पार्टी विभाग गठन तथा महाधिवेशनको कार्यतालिकालाई लिएर विवाद भइरहेको छ। सभापति देउवाले आफू अनुकूल ४१ विभाग खडा गर्ने प्रस्ताव ल्याएपछि वरिष्ठ नेता पौडेल र अर्का नेता कृष्णप्रसाद सिटौला असन्तुष्ट बनेका छन्।

केही दिन अघि बसेको केन्द्रीय समिति बैठकसमेत पौडेलले बहिष्कार गरेका थिए। सभापति देउवाले संस्थापन इतर समूहको मागअनुसार महाधिवेशनको एजेण्डालाई छलफलको विषय बनाउन नमानेपछि पौडेलले बैठक बहिष्कार गरेका थिए। यसअर्थमा शनिबार पौडेलकै निवासमा सभापति देउवा पुगेर गरिएको छलफललाई अर्थपूर्णरुपमा हेरिएको छ।

आइतबार कांग्रेसको केन्द्रीय समिति बैठक बस्दै छ।