काठमाडौं - अखिल नेपाल फुटबल संघ (एन्फा) को अनुशासन कमिटीले डिस्को जाने चार खेलाडीलाई प्रतिबन्ध लगाउनुका साथै जरिबाना लगाइएको छ। फिफा विश्वकप छनोटअन्तर्गत कुवेतविरुद्धको खेल खेल्न भुटान जानुभन्दा एक दिन अघि राति डिस्को गएका भन्दै एन्फाले विमल घर्ती मगर, दिनेश राजवंशी, अञ्जन विष्ट र सन्तोष तामाङलाई केही समयका लागि निलम्बन गर्नुकासाथै जरिवाना लगाएको हो।
यस अघि चारै खेलाडीले कुवेतसँगको खेल र १३ औं दक्षिण एसियाली खेलकुद (साग) गुमाएका थिए। उनीहरुले शनिबारदेखि सुरु हुने ए डिभिजन लिगसमेत खेल्न नपाउने भएका छन्।
एन्फाले विमल र दिनेशलाई ९० दिनको प्रतिबन्ध लगाएको छ भने अञ्जन र सन्तोषलाई ४५ दिनको प्रतिबन्ध लगाएको छ।उनीहरुको प्रतिबन्ध १३ डिसेम्बर अर्थात शुक्रबारदेखि लागु भएको छ। यस्तै चारै खेलाडीलाई ५० हजार जरिवाना समेत तोकिएको छ।
प्रतिबन्धसँगै चारै खेलाडीले सो अवधिमा एन्फाले आयोजना गरेको कुनैपनि प्रतियोगिता खेल्न नपाउने भएका छन्।
क्याम्पबाट झुटो बोलेर उनीहरुले नाइट क्लबमा रात बिताएका थिए। भुटान जानका लागि पैसा साट्न र सामान लिन जाने भन्दै टिम बसेको होटेलबाट उनीहरु बाहिरिएका थिए। तर राति चारै जना खेलाडीले नाइट क्लबमा रात बिताएको खबर प्रशिक्षक योहान कालिनले थाहा पाएपछि उनीहरुलाई तत्काल टिमबाट हटाइएको थियो।