करोडपति सुब्बा

काठमाडौं – शनिबार काठमाडौंबाट प्रकाशित अधिकांश राष्ट्रिय दैनिकले देशका विभिन्न भेगमा पानी तथा हिउँ परेको प्रसंगलाई प्राथमिकता दिएका छन्। लगातारको वर्षा र उच्च पहाडी भेग तथा हिमाली भेगमा शुक्रबार बिहानैदेखि परेको हिउँले जनजीवन प्रभावित बनाएको छ।

यसै विषयलाई नागरिकले हिमपातले कतै सकस कतै खुसी शिर्षकमा समाचार प्रकाशन गरेको छ। यस्तै द हिमालयन टाइम्सले खराब मौसमका कारण हवाई सेवा प्रभावित बनेको समाचारलाई प्राथमिकताका साथ प्रकाशन गरेको छ भने अन्नपूर्ण पोष्टले ...हिउँ पर्‍यो भुरुरु शिर्षकमा समाचार प्रकाशन गरेको छ।

नयाँ पत्रिकाले भने फरक विषयको समाचारलाई प्राथमिकतामा राखेको छ। सुब्बाले केही वर्षमै जोड्ने गरेको करौडौंको सम्पत्तिलाई प्राथमिकतामा राख्दै नयाँ पत्रिकाले करोडपति सुब्बा शिर्षकमा समाचार प्रकाशन गरेको छ।

नयाँ पत्रिका लेख्छ, सरकारले यसै वर्ष बढाएको तलबमानअनुसार नायब सुब्बाको तलब २८ हजार दुई सय छ। अचाक्ली महँगीमा यही तलबले गुजारा चलाएर थोरै पनि बचत निकाल्नु आमसुब्बाका लागि सपना मात्रै हुन सक्छ। तर, हजारमा तलब बुझ्ने केही सुब्बा करौडौंका मालिक भएका छन्। काठमाडौंलगायत सहरमा घरघडेरी, विलासी गाडी, व्यवसायमा लाखौं लगानी, बैंकमा अथाह बचत उनीहरुको आर्थिक धरातल हो। भ्रष्टाचारको समुद्रमा पौडिन माहिर उनीहरु अख्तियारको चल्तीको भाषामा सानो माछा हुन्।

कसले कति जोडे सम्पत्ति

मदनकुमार गुप्ता

मालपोतमा १७ वर्ष
खरिदारपछि १३ वर्ष सुब्बा
जोडे १५ करोडको अकुत सम्पत्ति

श्यामकृष्ण च्यामु श्रेष्ठ

विमानस्थलको रेडियो अपरेटर रहेर १४ करोड अवैध कमाइ
सुन तस्करीमा कनेक्सन्

सुरेश अधिकारी

यातायातका लेखापाल
खुलाउन सकेनन् ६ करोड सम्पत्ति स्रोत, तीन श्रीमतीदेखि दाजुभाइको नाममा लुकाए

रामप्रसाद भट्टराई

भन्सारमा जागिर गरेर ३ करोड कमाए, २ करोड अवैध

ललितकुमार झा

मुखियाबाट जागिर सुरु, अध्यागमनमा बसेर कमाएको डेढ करोड अवैध