काठमाडौं– नेपाल (नीलो) र जापानिज फुटबल लिग (जेएफएल)ले आज मैत्रीपूर्ण फुटबल खेल्दैछन्।
राजधानीको त्रिपुरेश्वरस्थित दशरथ रंगशालामा दिउँसो ३ बजे यी दुई टिमबीच प्रतिस्पर्धा हुन लागेको हो।
नेपाल (नीलो) टिममा यु–१९ र सिनियर टिमका खेलाडी सहभागी हुनेछन्। यसअघि जेएफएलसँग साग विजेता नेपाली टोलीलाई खेलाउने बताइएको थियो।
तर, नेपाली टोलीका आधाभन्दा बढी खेलाडी घाइते भएकाले अखिल नेपाल फुटबल संघले नेपाल (नीलो) टिम बनाएर खेलाउन लागेको हो। तर, टिमका खेलाडीबारे अझै सार्वजनिक गरिएको छैन।
टिमको मुख्य प्रशिक्षकको जिम्मेवारी मेघराज केसीले पाएका छन्।
जेएफएलमा भने यु–२२ खेलाडी छन्। जेएफएलको प्रशिक्षकको जिम्मेवारी इबाताले पाएका छन्। उनले जापानको जे लिग क्लबसमेत हेरिरहेका छन्।
जेएफएलले आइतबार पूर्वलिग विजेता मनाङ मस्र्याङ्दीसँग पनि एक मैत्रीपूर्ण खेल खेल्नेछ।
जेएफएल जापानिज फुटबल संघको पहलमा नेपाल आएको हो।