एजेन्सी– बुधवार मध्य रातिसम्मको म्याद सकिँदा पनि इजरायली संसदमा मुख्य दुई ठूला दलले सरकार बनाउन नसकेपछि एक वर्षमै तेस्रो पटक संसदीय निर्वाचन हुने भएको छ। स्थानीय सञ्चारमाध्यमका अनुसार आगामी मार्चमा त्यहाँ अर्को आमनिवार्चन हुनेछ। केनसेट भनिने इजरायली संसदले जतिसक्दो चाँडो निर्वाचनको मिति घोषणा गर्नुपर्ने बाध्यता छ।
वर्तमान प्रधानमन्त्री बेन्जामिन न्यातान्याहु र उनको विरोधी दल बेन्नी गान्च मिलिजुली सरकार बनाउन असमर्थ भएपछि संसद बुधबार राति स्वतः विघटन हुन पुगेको हो। हाल त्यहाँ कामचलाउ सरकार छ।
गत सेप्टेम्बरमा भएको संसदीय निर्वाचनमा प्रधानमन्त्री न्यातान्याहुको लिकुड पार्टी तथा गान्चको ब्लु एण्ड ह्वाइट पार्टीले हासिल गरेको जनमतले कुनै पनि दललाई सरकार बनाउन तोकिएको अन्तिम मितिसम्म पनि सरकार बनाउन नसकेपछि यस्तो स्थिति आएको हो। यसै वर्षको अप्रिलमा पनि इजरायलमा संसदको निर्वाचन भएको थियो।