काठमाडौं– सरकारका प्रवक्ता तथा सञ्चार तथा सूचना प्रविधि मन्त्री गोकुलप्रसाद बाँस्कोटाले खेलाडीहरुले पैसाको लागि नखेलेको टिप्पणी गरेका छन्।
मन्त्रिपरिषद् बैठकले गरेका निर्णयबारे जानकारी दिन मन्त्रालयमा आयोजित नियमित पत्रकार सम्मेलनमा मन्त्री बाँस्कोटाले खेलाडीहरुलाई प्रोत्साहन गर्न सरकारले कुनै कसर बाँकी नराख्ने प्रष्ट पारे । यसै साता सम्पन्न १३ औं दक्षिण एसियाली खेलकुद (साग) का पदक विजेताका लागि सरकारले घोषणा गरेको पुरस्कारको अन्योलबारे सञ्चारकर्मीले राखेको जिज्ञासामा उनले भने, ‘खेलाडीहरुले पैसाका लागि खेलेका हैनन्, देशका लागि खेलेका हुन् । आफूले पाएको पदक देशका लागि समर्पित गरेका छन् ।’
कुन पदक पाउने खेलाडीले कति प्रोत्साहन रकम पाउने भन्ने उनले स्पष्ट पारेनन् । कार्यविधि बनाएर, छलफल गरेर खेलाडीहरुलाई प्रोत्साहन रकम दिइने उनले बताए । ‘साग सफलतापूर्वक सम्पन्न भएको छ । दक्षिण एसियामा नेपाल सुपर पावरको रुपमा स्थापित हुने देखिएको छ खेल क्षेत्रमा । यो खुसीको कुरा हो । खेलाडीलाई उत्साहित हुने वातावरण सरकारले बनाउँछ,’ उनले भने ।