काठमाडौं - काठमाडौंमा शुक्रबार सातौँ अन्तर्राष्ट्रिय लोकवार्ता कङ्ग्रेस सुरु हुँदै छ।
तीन दिनसम्म चल्ने सम्मेलनमा एसिया, युरोप तथा अमेरिकाका विज्ञहरूले लोकवार्ता तथा संस्कृतिसम्बन्धी विषयमा छलफल गर्नेछन्। कङ्ग्रेसको आयोजना नेपाली लोकवार्ता तथा संस्कृति समाजले गर्न लागेको हो।
सम्मेलनमा लोकवार्ता, संस्कृति, लोकसाहित्य, समाजशास्त्र, मानवशास्त्र, सङ्गीतशास्त्र, भाषाविज्ञान, पर्यटन, इतिहास, भूगोल, कम्प्युटर विज्ञान, इन्जिनियरिङ जस्ता विधामा विद्वान्हरूले ८६ वटा कार्यपत्र प्रस्तुत गर्नेछन्।
साथै कङ्ग्रेसमा लोककथा कथन, लोकगीत गायन र लोक नृत्यको एक विशेष सत्र पनि रहनेछ।
समाजले सन् २००१ मा पहिलो, सन् २००३ मा दोस्रो, सन् २००९ मा तेस्रो, सन् २०१२ मा चौथो, सन् २०१५ मा पाँचौँ र सन् २०१८ मा छैटौँ अन्तर्राष्ट्रिय लोकवार्ता तथा संस्कृति कङ्ग्रेस आयाेजना गरेकाे थियाे। यस्तै समाजले सन् २००६ मा पहिलो र सन् २०१२ मा दोस्रो राष्ट्रिय लोकवार्ता तथा संस्कृति कङ्ग्रेस र सन् २०१७ मा विशेष अन्तर्राष्ट्रिय लोकवार्ता तथा संस्कृति कङ्ग्रेसको आयोजना गरिसकेको छ।