जनकपुरधाम– झुटो विवरण पेश गरेर नेपाली नागरिकताको प्रमाणपत्र बनाउन खोज्ने दुईजना जनकपुरबाट पक्राउ परेका छन्। पक्राउ पर्नेमा धनुषाधाम नगरपालिका–२ बस्ने जीत नारायण यादव र भारतको विहार राज्य मुजफ्फरपुर ग्राम शंकरपुर बस्ने सुनिल कुमार यादव छन्। पक्राउ परेका भारतीय नागरिक सुनिल धनुषाधाम बस्ने जीतनारायणका ज्वाइँ रहेको बताइएको छ।
जिल्ला प्रशासन कार्यालयमा झुटो विवरण पेश गरी नागरिकता बनाउन खोज्दा सोधपुछको क्रममा दुवैजना पक्राउ परेको प्रमुख जिल्ला अधिकारी प्रदीपराज कँणेलले जानकारी दिए। जीतनारायण र सुनिल नागरिकता बनाउन मंगलबार जिल्ला प्रशासन कार्यालय पुगेका थिए। सोही क्रममा उनीहरु पक्राउ परेका हुन्।
प्रमुख जिल्ला अधिकारी कँणेलले सोधपुछको क्रममा ससुरा जीतनारायणले शंकास्पद जवाफ दिएको बताए। भारतीय नागरिक सुनिललाई नागरिकता बनाउन वडा कार्यालयले समेत सिफारिस गरेको छ। कँणेलका अनुसार नागरिकता बनाउन सिफारिस गर्न वडाअध्यक्ष प्रभुनारायण साहले १० हजार रुपैयाँ घुस लिएको पक्राउ परेका जीतनारायणले बयान दिएका छन्।
वडाध्यक्षलाई नियन्त्रणमा लिन निर्देशन
झुटो विवरण पेश गरी नेपाली नागरिकता बनाउन खोज्ने भारतीय नागरिकलाई सिफारिस गरेको भन्दै जिल्ला प्रशासन कार्यालयले वडाध्यक्ष साहलाई पक्राउ गर्न प्रहरीलाई निर्देशन दिएको छ। कँणेलले वडाध्यक्ष साहलाई पक्राउ गर्न प्रहरीलाई पत्राचार गरिएको बताए।
पक्राउ परेका दुवै जनालाई जिल्ला प्रहरी कार्यालय धनुषाको हिरासतमा राखेर थप अनुसन्धान भइरहेको कँणेलले बताए।