प्रदेश २ : नेकपा ( एस) का पक्षमा १० सांसदको सनाखत

जनकपुरधाम– नेकपा एमालेबाट अलग्गिएर बनेको नेकपा एकीकृत समाजवादी पार्टीका पक्षमा १० जना प्रदेशसभा सदस्यहरुले सनाखत गराएका छन्। जनकपुरधामस्थित निर्वाचन आयोगको कार्यालय पुगेर बिहीबार १० जना सांसदले सनाखत गराएका हुन्। 

१० जना प्रदेशसभा सदस्यहरु उपस्थित भएर सनाखत गराएका छन् भने एक जना अस्वस्थ भएकाले निवर्गाचन आयोगमा निवेदन पठाएर पत्रमार्फत सनाखत गराउने बताइएको छ।  सनाखत गराउने प्रदेशसभा सदस्यहरुमा मदनसेन श्रीवास्तव, नागेन्द्र यादव, गोविन्द न्यौपाने, शत्रुधन महतो, रवीन्द्र बैठा, मञ्जु यादव, हसिमा खातुन, बेची लुंगेली, अशोक यादव र प्रमोद यादव छन्। 

प्रदेशसभा सदस्य डिल्ली उप्रेती स्वास्थ्य उपचारका क्रममा नयाँदिल्लीमा रहेको र उताबाट उनको निवेदन आए लगत्तै सनाखत गराइने नेकपा एकीकृत समाजवादी पार्टीका नेता शत्रुधन महतोले जानकारी दिए।  त्यस्तै सुन्दरबहादुर विश्वकर्मा र सीता गुरुङले आइतबार सनाखत गराउने उनले बताए। 

 लोसपाका पक्षमा थप २ जना प्रदेशसभा सदस्यहरुले सनाखत गराएका छन्। लोसपाको पक्षमा ‍डिम्पल झा र प्रह्लाद गिरीले सनाखत गराएका हुन्। थप दुई प्रदेशसभा सदस्यले लोसपाको पक्षमा सनाखत गराएसँगै लोसपाको पक्षमा सनाखत गराउने प्रदेशसभा सदस्यहरुको संख्या १२ पुगेको छ।