‘विजयबाबु स्मृति पत्रकारिता पुरस्कार’ ध्रुवहरि अधिकारीलाई

काठमाडौं– नेपाल समाचार केन्द्र प्रालिले नेपालको पत्रकारिताको विकासमा चार दशकदेखि पुर्याएको विशिष्ट योगदानको कदरस्वरुप पत्रकार ध्रुवहरि अधिकारीलार्ई ‘विजयबाबु स्मृति पत्रकारिता पुरस्कार’ प्रदान गरेको छ ।

मंगलबार आयोजित कार्यक्रममा नेपाल राष्ट्र बैंकका गभर्नर डा. चीरन्जीवी नेपालले उनलाई कदरस्वरुप नगद पुरस्कार र सम्मानपत्र प्रदान गरे । खत्रीको रुपन्देहीको शालझण्डीमा २०६८ साल मङ्सिर १२ गते सवारी दुर्घटनामा निधन भएपछि उनकी धर्मपत्नी लक्ष्मी श्रेष्ठले उक्त स्मृति पुरस्कार स्थापना गरेकी हुन् ।

त्रिभुवन विश्वविद्यालयबाट स्नातक, लण्डन स्कूल अफ जर्नालिजमबाट अनर्स सहितको डिप्लोमा गरेका पत्रकार अधिकारीले स्वतन्त्र पत्रकारितासँगै पत्रकारिता अध्यापन र अनुशिक्षणमार्फत मुलुकको पत्रकारिता क्षेत्रको श्रीवृद्धिका लागि विशिष्ट योगदान पुर्याउँदै आएका छन् ।

कार्यक्रममा गर्भनर डा. नेपालले पत्रकारिताको सिद्धान्त र आचरणभित्र रही स्वच्छ एवं स्वतन्त्र पत्रकारिता गर्ने पत्रकारका रुपमा वरिष्ठ पत्रकार अधिकारी स्थापित भएको बताए ।

नेपाल पत्रकार महासङ्घका अध्यक्ष गोविन्द आचार्यले स्वतन्त्ररुपले कलम चलाउँदै आएका पत्रकार अधिकारीलाई पुरस्कार प्रदान गर्नु भनेको नेपाली पत्रकारिता क्षेत्रकै सम्मान भएको बताए ।

पुरस्कृत अधिकारीले पत्रकारिता क्षेत्रको विश्वासनीयता प्रतिको सम्मानका रुपमा पुरस्कार ग्रहण गरेको बताउँदै पत्रकारिता क्षेत्रले मर्यादा र शिष्टतालाई छोड्न नहुनेमा अहिले समाजमा त्यो कम हुँदैगएको भनी आलोचना सुनिँदै आएको बताए ।