भैरहवा । रुपन्देहीको सियारी गाउँपालिका–२ मा नक्कली कागजात बनाई एक व्यक्तिले करिब २ बिघा जग्गा हडपेको खुलेको छ । भारतबाट नक्कली कागजात बनाएर त्यही आधारमा वडाको सिफारिस लिई जग्गा आफ्नो नाममा बनाएको खुलेको हो ।
भारतको गोरखपुर जिल्लाबाट प्रधानपञ्चको नक्कली कागजात बनाएर सियारी गाउँपालिका वडा नम्बर २ कार्यालयबाट सिफारिस लिई बुद्धिराम कहाँरको नाममा जग्गा नामसारी गरेको पाइएको छ । तर, यो नामको कोही व्यक्ति नै छैन । मालपोत कार्यालयबाट बेलर कहाँरको भाइ बुद्धिराम कहाँरको नाममा जग्गा नामसारी भएको भेटिएको छ । बुद्धिरामको नाममा भारतबाट कागजात ल्याइएको भए पनि बुद्धिराम भन्ने कोही व्यक्ति नै नभएको गोरखपुर ग्रामसभा गोपलापुर ग्राम प्रधान ज्ञानमती देवीले बताएकी छन्।
बेलर कहाँरले २०३६ सालमा सियारी गाउँपालिका वडा नम्बर २ मा ७ वटा कित्ता भएको जग्गा खरिद गरेका थिए । जग्गाधनी बेलरको २०६६ साल भदौ २२ गते मृत्यु भयो । बेलरका छोरा नभएको र छोरीको बिहे भएका कारण कहाँरहरु सामूहिक परिवारमा बसेका थिए । त्यसैले कसैका नाममा जग्गा नामसारी भएको थिएन ।
कहाँर परिवारले थाहै नपाई २०७६ भदौ १९ गते बुद्धिराम कहाँरको नाममा जग्गा नामसारी भएको छ । नामसारी भई भदौ २७ गते उक्त जग्गा ४ जनाको नाममा बिक्रीसमेत भइसकेको छ । जग्गाधनीका भाइ दयानाथ गौँडले जग्गाको पुर्खौंदेखि मालपोत शुल्क तिरेको र यो वर्षको पनि शुल्क तिरेको सक्कल रसिद आफूसँग भएको तर जग्गा अर्कैको भइसकेको गुनासो गरे ।
‘बेलर कहाँरको सक्कल लालपुर्जा हामीसँग छ । मृत्यु दर्ताको सूचक हामीसँग छ तर, सियारी गाउँपालिका वडा नम्बर २ का अध्यक्ष राम किसन थारुको हस्ताक्षर भएका विभिन्न कागज बनाई नक्कली भारतीय मान्छे बुद्धिराम कहाँर खडा गरेर नामसारी गरिएको छ । वडा सदस्य बृज नारायण यादवको रोहबरमा उक्त किर्ते काम भएको हो,’ गौँडले भने ।
सियारी गाउँपालिकाका अध्यक्ष अयोध्या थारुले बेलर कहाँरको जग्गा बुद्धिराम कहाँरको नाममा गयो भनेर दयानाथ गौंड र विश्वनाथ प्रसाद कहाँरले छानबिन गरिपाऊँ भनेर निवेदन दिएको बताए । ‘कागजात हेर्दा तीनपुस्ते देखियो अनि हामीले छानबिन सुरु गर्यौँ, वडा कार्यालयबाट फाइल झिकायौँ,’ थारुले भने । अहिले उक्त जग्गा रोक्का भएको उनले जानकारी दिए । भारतबाट बुद्धिराम कहाँरले आधार कार्ड, निर्वाचन कार्ड र सिफारिस लिएर आएपछि आफूले सम्बन्धित टोलमा सर्जमिन गराएको उनले बताए ।
मालपोत कार्यालय भैरहवाका प्रमुख कुमार आचार्यले मुलुकी देवानी संहिता ऐन २०७४ बमोजिम अस्थायी पुर्जा बन्ने व्यवस्थाबमोजिम वडाको सिफारिसमा जग्गा नामसारी भएको बताए । ‘मैले यहाँबाट सर्जमिन गर्न पठाएँ, उहाँहरु गएर बुझ्दा उसले पेश गरेको व्यहोरालाई समर्थन गर्ने गरी सर्जमिन भएको हुनाले पुर्जा बन्यो । जग्गा भएको ठाउँका जनप्रतिनिधिले सबै कुरा बुझ्नुपर्ने हो,’ प्रमुख आचार्यले भने ।