आज भ्रष्टाचार विरुद्धको अन्तर्राष्ट्रिय दिवस, सुध्रिएन अवस्था

काठमाडौं- आज भ्रष्टाचार विरुद्धको अन्तर्राष्ट्रिय दिवस, नेपालमा पनि विविध कार्यक्रम गरि मनाइदै छ ।

दिवसका अवसरमा विभिन्न संघ संस्थाले कार्यक्रम गर्दैछन् । काठमाडौंमा विहान प्रभातफेरि निकालिएको थियो ।

संयुक्त राष्ट्रसंघले सन् २००३ मा भ्रष्टाचार विरुद्धको अन्तर्राष्ट्रिय महासन्धि पारित गरेपछि विश्वभर डिसेम्बर ९ तारिखलाई भ्रष्टाचार विरुद्धको दिवस मनाउन थालिएको हो । नेपालले सन् २०११ मा महासन्धीलाई अनुमोदन गरेको हो ।

सरकारले भ्रष्टाचार न्युनीकरणका लागि प्रतिबद्ध रहेको बताएपनि नेपालमा भ्रष्टाचार बढीरहेको अन्तर्राष्ट्रिय अध्ययनहरुले देखाएको छ । ट्रान्सपरेन्सी इन्टरनेशनलको प्रतिवेदनअनुसार नेपालको अवस्था सुध्रिन सकेको छैन् ।

नेपालमा अख्तियार दुरुपयोग अनुसन्धान आयोग, राष्ट्रिय सर्तकता केन्द्र, सम्पत्ति शुद्धीकरण विभाग, अपराध अनुसन्धान ब्युरोलगायतका निकायले भ्रष्टाचार रोक्ने जिम्मेवारी पाएका छन् ।

तर, साधन स्रोत र कसिलो सरकारी रणनीति नहुँदा यस्ता संस्थाले सोचेअनुरुप काम गर्न सकेका छैनन् ।