सोमबार, चैत १७, २०७६

समाचार

धनकुटामा एभोकाडो प्रशोधन उद्योग खोलिँदै

धनकुटामा एभोकाडो प्रशोधन उद्योग खोलिँदै

इटहरी– २०७५ असार ८ गते नगरसभाबाट सर्वसम्मत एभोकाडोको राजधानी घोषणा भएको धनकुटा नगरपालिकाले एभोकाडो प्रशोधन केन्द्र संचालन गर्ने भएको छ । मेयर चिन्तन तामाङका अनुसार ५० रोपनी क्षेत्रफलमा एभोकाडोको उद्योग संचालनको तयारी छ ।

पौष्टिक तत्वहरुले भरिएको एभोकाडो फलबाट कस्मेटिक्स, जुसदेखि वाइनका विभिन्न उत्पादनहरु बन्ने भएकोले उद्योग संचालनको तयारी नगरपालिकाले गरेको छ । ‘उद्योग संचालनको लागि कम्तिमा ५० रोपनी जग्गामा स्थापना गर्ने उद्योगको डिपिआर बन्ने क्रममा रहेको छ । पूर्वाधारका कामहरु अगाडि बढेपछि उद्योग संचालनमा आउँछ,’ मेयर तामाङले भने ।

धनकुटा नगरपालिकाको आर्थिक विकास शाखा अधिकृत विकास अधिकारीले धनकुटामा एभोकाडोको उत्पादन बढ्दै गएकोले उद्योग स्थापनाको पहल गरिएको बताए । वार्षिक २ लाख किलो बढी उत्पादन हुने फलबाट उद्योग संचालनको कच्चा पदार्थ पुग्ने भएकोले उद्योगको तयारी गरिएको अधिकारीले बताए ।

१११ वर्गकिलोमिटर क्षेत्रफलमा फैलिएको धनकुटामा हाल १२ हजार बोटले फल दिइरहेको, १४ हजार फल्ने अवस्थामा पुगेको र १ लाख बढी बिरुवाहरु लगाइएको अधिकारीले जानकारी दिए । ‘नगरपालिकाले आफ्नै नर्सरी स्थापना गरेर विरुवा वितरण गरिरहेको छ ।’

मेक्सिकोमा उद्गम भएको भनिने एभोकाडोको माग नेपालमा वार्षिक २० लाख र छिमेकी देशहरुमा झनै धेरै भएकोले उत्पादनमा नगरपालिकाले ध्यान दिएको मेयर तामाङ बताउँछन् । मेयर कृषि कार्यक्रमबाट एभोकाडो उत्पादनमा प्रोत्साहन गरिएको मेयर तामाङले बताए ।

धनकुटा नगरपालिका ४ का स्थानीय राजकुमार तामाङले एकै बोटबाट तीन लाखसम्म कमाएको भन्दै एभोकाडोलाई थप आम्दानीमूलक बनाउन उद्योग स्थापना गर्न लागेको बताए । ३० वर्ष अगाडि नै धनकुटाको पाख्रिबास कृषि अनुसन्धान केन्द्रमा विदेशीले भित्र्याएको एभोकाडो पछिल्ला केही वर्षमा धनकुटामा व्यावसायिक खेती हुन थालेको हो ।

कृषि विज्ञहरुको अनुसन्धानले धनकुटाको माटो र हावापानीमा फल दिने राम्रो उत्पादन एभोकाडो भएको निष्कर्ष दिएपछि एभोकाडोमा विशेष ध्यान दिइएको मेयर तामाङ बताउँछन् ।

एभोकाडोको राजधानी घोषणा गरेर कार्यक्रम अगाढि बढाएको नगरपालिकाले यस अगाडि २०७५ मंसिर ८ मा एसियामा पहिलोपटक एभोकाडो महोत्सव आयोजना गरेको थियो । यस्तै, नगरपालिकाको वडा नम्बर ६ स्थित परिचयमोडमा नगरपालिकाले एभोकाडोको प्रतिमा स्थापना गर्दै एभोकाडो पार्क समेत बनाएको छ ।

प्रतिक्रिया दिनुहोस्