काठमाडौं। जारी १३औं दक्षिण एसियाली खेलकुद (साग)अन्तर्गत पुरुष क्रिकेटमा नेपालले आज बंगलादेशको यू २३ सँग खेल्दैछ । बंगलादेश स्वर्ण पदक दाबेदार हो।
यो खेल जितेमा नेपाल फाइनलमा पुग्नेछ। पाँच राष्ट्र सहभागी पुरुष क्रिकेटअन्तर्गत राउण्ड रोविन लिगको पहिलो खेलमा नेपाल श्रीलकासँग ६ विकेटले पराजित भएको थियाृ । भुटान र माल्दिभ्सविरुद्ध भने नेपालले सहज जित हात पारेको छ ।
श्रीलंका र बंगलादेशको खेल हुनै बाँकी भएकाले फाइनल पुग्न नेपालले आजको खेल जित्नैपर्ने बाध्यता छ । पराजित भएमा भने नेपालको स्वर्ण सम्भावना आजै समाप्त हुनेछ ।
श्रीलंका लगातार तीन खेल जित्दै ६ अंकका साथ अंक तालिकामा शीर्ष स्थानमा छ । बंगलादेशको २ खेलबाट ४ अंक छ । र, दुवै टिम अपराजित छन् । माल्दिभ्स र भुटानले ३ खेल खेलिसकेका छन् र सबैमा हार बेहोरेका छन् । आज नै भुटान र माल्दिभ्सबीच पनि खेल हुनेछ ।