कुस्तीमा नेपाललाई एक रजत र एक कास्य

जनकपुरधाम -१३औं सागअन्तर्गत महिलातर्फ नेपालका सिवांगी दुवेले रजत र पुरुषतर्फ ५७ केजी तौल समूहमा नरेशप्रसाद यादवले कास्य पदक जितेका छन्।

जनकपुरमा शुक्रबार भएको ६५ केजी तौल समूहमा नेपालका सरोज यादवले कास्य पदक जिते।

कुस्तीमा महिलातर्फ ५० र ५३ केजी तथा पुरुषतर्फ ५७ र ६५ केजी तौल समूहमा भारतले स्वर्ण पदक जितेको जितेको छ।

५० केजी तौल समूहको महिला कुस्तीमा भारतकी तोमर शीतलले स्वर्ण र श्रीलंकाकी निरोशनीले रजत जिते।

यसैगरी महिलातर्फ नै ५३ केजी तौल समूहमा भएको खेलमा भारतकी पिंकीले स्वर्ण र श्रीलंकाकी समिकाले कास्य पदक हात पार्न सफल भएका छन्।

पुरुषतर्फ ५७ केजी उमेर समूहमा भारतका राहुलले स्वर्ण, श्रीलंकाका कथुरांगनाले रजत जिते। ६५ किलो उमेर समूहमा भएको खेलमा पनि भारतकै अमित कुमारले स्वर्ण जिते।

श्रीलंकाका चमाराले रजत र नेपालका सरोज यादवले कास्य पदक प्राप्त गरे।

सागअन्तर्गत शुक्रबारदेखि जनकपुरको मुजेलियास्थित कभर्डहलमा कुस्ती प्रतियोगिता सुरु भएको हो। २३ गतेसम्म चल्ने प्रतियोगितामा नेपालसहित भारत, श्रीलंका, पाकिस्तान र बंगलादेशले प्रतिस्पर्धा गरिरहेका छन् ।