साग क्रिकेट : नेपालद्वारा भुटानसामु २३७ रनको विशाल लक्ष्य प्रस्तुत

काठमाडौं– १३ औं दक्षिण एसियाली खेलकुद प्रतियोगिता (साग)अन्तर्गत क्रिकेटमा नेपालले भुटानसामु २३७ रनको विशाल लक्ष्य प्रस्तुत गरेको छ।

कीतिपुरस्थित त्रिवि क्रिकेट मैदानमा बिहीबार टस हारेर ब्याटिङ गरेको नेपालले निर्धारित २० ओभरमा तीन विकेट गुमाएर २३६ रनको विशाल स्कोर खडा गर्यो।

नेपालका लागि कप्तान ज्ञानेन्द्र मल्ले सर्वाधिक १०७ रन जोडे। उनले ५५ बलमा ५ चौका र ९ छक्का प्रहार गरे। यस्तै, पारस खड्काले ५७ रनको योगदान दिँदा उपकप्तान दीपेन्द्रसिंह ऐरीले अविजित ४५ रन जोडे।

भुटानका लागि के दोर्जीले दुई तथा टि सिंघेले एक विकेट लिए।

भुटानले केही बेरमा जवाफी ब्याटिङ थाल्नेछ।