खोप लगाउँदा शिशुको मृत्यु

डोटी- डोटीमा खोप लगाउँदा एक शिशुको मृत्यु भएको छ।

जोरायल गाउँपालिका–१ घण्टेश्वर स्वास्थ्य चौकीमा खोप लगाएपछि स्थानीय एक चार महिने शिशुको मंगलबार मृत्यु भएको हो ।

खोप लगाएका स्थानीय टेकबहादुर मल्लका चार महिनाका नाती प्रविणको मृत्यु भएको मल्लले जानकारी दिए। उनले खोपकै कारण नातीको ज्यान गएको दाबी गरेका छन्।

मंगलबार दिउसो २ बजे खोप लगाएर प्रविणलाई घर लगिएकोमा राति सुतेकै अवस्थामा मृत्यु भएको थियो। उनलाई डीपीटी पेण्टा खोप लगाएको स्वास्थ्य कार्यालय डोटीका प्रमुख रमेश मलासीले जानकारी दिए।

उनले शिशुको मृत्यु खोपकै कारणले भएको हो या अन्य कारणले हो भन्ने अहिले नै भन्न नससिकने बताए।

शिशुको पोष्टमार्टमपछि मात्र मृत्युको कारण खुल्ने मलासीले बताए। पोष्टमार्टमका लागि जिल्ला अस्पतालमा डाक्टर नभएपछि शव धनगढी लगिएको छ।