काठमाडौं- सत्तारुढ दल नेकपाले हालै सम्पन्न उपनिर्वाचनको समीक्षा गरेको छ ।
पार्टी अध्यक्ष पुष्पकमल दाहाल ‘प्रचण्ड’ को अध्यक्षतामा आज (बुधबार) बिहान पार्टी मुख्यालय धुम्बाराहीमा बसेको सचिवालय बैठकले उपनिर्वाचनमा पार्टीभित्र अन्तरघात नभएको निष्कर्ष निकालेको छ ।
बैठकमा उपनिर्वाचनको मतपरिणामबारे समीक्षा भएको थियो । बैठकमा उपनिर्वाचनमा घात–प्रतिघात नभएको निष्कर्ष निकालेको भए पनि विस्तृत रुपमा अर्को बैठकमा छलफल हुने बताइएको छ ।
आजको बैठकले ३७ वटा जिल्ला कमिटीलाई निर्वाचनको समीक्षात्मक रिपोर्ट केन्द्रलाई बुझाउन निर्देशन दिएको छ । आगामी बैठकले स्थायी कमिटी र केन्द्रीय कमिटीको बैठक बोलाउनेबारेमा निर्णय लिने पार्टी प्रवक्ता नारायणकाजी श्रेष्ठले जानकारी दिए ।
साथै बैठकमा प्रधानमन्त्री तथा नेकपा अध्यक्ष केपी शर्मा ओलीको स्वास्थ्य लाभको कामना पनि गरिएको प्रवक्ता श्रेष्ठले बताए ।
नेकपा सचिवालयको अर्को बैठक मंसिर २३ गते बस्नेछ ।