सोमबार, जेठ १२, २०७७

समाचार

प्रदेश ५ सरकारले दियो ३५ जनालाई पदक

1581827561BKC_Butwal.jpg
प्रदेशको तेस्रो स्थापना दिवसका अवसरमा लुम्बिनीमा शान्ति स्तुपा निर्माण गर्दा हत्या गरिएका जापानिज नागरिक भिक्षु नावातामेलाई मरणोपरान्त प्रदेश ५ सरकारले वितरण गरेको बुद्ध शान्ति पदकबाट सम्मान गरिएको पदक ग्रहण गर्नु हुँदै उनका धर्म भाइ तसुमा सातो। तस्बिर : रासस

बाँके– प्रदेश स्थापना दिवसको अवसरमा प्रदेश ५ सरकारले ११ विधामा ३५ जनालाई पदक प्रदान गरेको छ।

प्रदेश सरकारको सर्वोत्कृष्ट पदक ‘बुद्ध शान्ति पदक’ लुम्बिनीको विकासमा योगदान पुर्‍याएका जापानिज नागरिक भिक्षु नावातामेलाई (मरणोपरान्त) प्रदान गरिएको छ।

जापान सरकारले लुम्बिनीमा निर्माण गरेको विश्व शान्ति स्तूपा निर्माणका क्रममा नावाताको हत्या भएको थियो। भिक्षु नावातामेको तर्फबाट उनका धर्म भाइ तसुमा सातोलाई सो सम्मान प्रदान गरिएको छ।

यस्तै, ‘प्रदेश प्रमुख जनसेवा पदक प्रथम’बाट संघीयता, गणतन्त्र र साहित्य, कला क्षेत्रमा उत्कृष्ट योगदान पु¥याएका रूपन्देहीका मोदनाथ प्रश्रितलाई सम्मानित गरिएको छ।

प्रदेश प्रमुख जनसेवा पदक द्वितीयबाट पत्रकारिता तथा साहित्य क्षेत्रमा विशिष्ठ योगदान एवं संघीयता र गणतन्त्रको प्राप्तिको संघर्षमा मृत्यु भएका अर्घाखाँचीका कृष्ण शेन इच्छुक (मरणोपरान्त)लाई दिइएको छ। सो पदक उनकी पत्नी तक्मा केसीलाई बाट प्रदान गर्रियो।

यस्तै, प्रदेश प्रमुख जनसेवा पदक प्रदेशको प्रथम आवधिक योजना तर्जुमामा विशिष्ठ योगदान गरेका प्रदेश योजना आयोगका पूर्वउपाध्यक्ष डा. प्रकाशकुमार श्रेष्ठलाई प्रदान गरिएको छ। प्रदेश प्रमुख जनसेवा पदक तृतीयबाट संघीयता र गणतन्त्र प्राप्तिको आन्दोलनमा विशिष्ठ योगदान पु¥याएका दम्पती सूर्यप्रकाश पुन र परम्परा गौतम (मरणोपरान्त)लाई दिइएको छ। सो पदक सन्दीप पुनलाई प्रदान गरियो ।

प्रमुख जनसेवा पदक तृतीयबाट संघीयता र गणतान्त्रिक आन्दोलनमा उल्लेखनीय योगदान पु¥याएको आन्दोलनका क्रममा एकै परिवारका ६ जनाले ज्यान गुमाएका दाङका भगौता थारुलाई सम्मान गरियो।

यस्तै ‘मुख्यमन्त्री प्रज्ज्वल दीप प्रथम पदक’बाट प्रदेशको विकास र प्रतिष्ठामा विशिष्ठ योगदान गरेका प्रदेशसभाका पूर्वसदस्य उत्तरकुमार वलीलाई (मरणोपरान्त) दिइएको छ। सो पदक उनकी पत्नी विमला वलीलाई प्रदान गरियो।

प्रदेश सेवा समर्पण पदक प्रथमबाट प्रदेश ५ को प्रमुख सचिवका रुपमा उत्कृष्ट एवं प्रशंसनीय काम गरेका प्रदेश सरकारका पूर्वप्रमुख सचिव डा तीर्थराज ढकाल र प्रदेश सेवा समर्पण द्वितीयबाट प्रदेश ५ को प्रदेशसभाको सचिवका रुपमा विशिष्ठ एवं प्रशंसनीय कार्य गरेका सुरेन्द्र अर्याललाई पदक प्रदान गरियो।

समाजसेवा श्री प्रथम पदकबाट दाङका वरिष्ठ पत्रकार नारायणप्रसाद शर्मा रेग्मी, समाजसेवा श्री द्वितीय पदक गुल्मीका शमशेरबहादुर खत्री (मरणोपरान्त), दाङकी हिमादेवी उपाध्याय (मरणोपरान्त)लाई सम्मान गरिएको छ।

समाजसेवा श्री द्वितीय पदकबाट बाँकेको अशोककुमार रोकाय क्षेत्री, समाजसेवा श्री तृतीय पदकबाट प्यूठानका डा.लेखराज सुवेदी र पाल्पा मदन पोखराका समाजसेवी घण्टप्रसाद अर्याल र रुपन्देहीका एजाज आलमलाई प्रदान गरिएको थियो।

प्रदेश रत्नपदक प्रथमबाट थारु भाषा संस्कृतिमा योगदान गरेका दाङका महेश चौधरी, शिक्षा सामाजिक क्षेत्रमा योगदान गरेका गुल्मीका परमानन्द भण्डारी (मरणोपरान्त) प्रदेश रत्न द्वितीयबाट सम्मानित गरिएको छ।

रूपन्देहीमा रहेर कृषि क्षेत्रमा योगदान गरेका सिपी शर्मा र शशिधर शर्मा द्वितीय, भाषा साहित्यका क्षेत्रमा योगदान गर्ने कपिलवस्तुका प्राध्यापक डा. विष्णुराज आत्रेय, चित्रकला र मूर्तिकलाका क्षेत्रमा योगदान गर्ने रुपन्देहीका नर्बु लामा, शिक्षा क्षेत्रमा योगदान गर्ने बुद्धिबहादुर रायमाझी, अल्लो उत्पादनमा योगदान गरेकी प्यूठानकी चित्रकली बुढा र खेलकुद क्षेत्रमा योगदान गरेका क्रिकेट खेलाडी सोमपाल कामीलाई प्रदेश रत्न तृतीय पदकबाट सम्मानित भए।

पुथा श्री शिखर द्वितीय पदकबाट पर्यटकीय क्षेत्रमा योगदान गरेका बाँकेका कृष्णलाल चौधरी, प्रदेश प्रज्ञा पदक द्वितीयबाट संस्थागतरूपमा प्रदेशमा सामुदायिक क्याम्पसमध्येबाट लुम्बिनी वाणिज्य क्याम्पस र तृतिय पदक गुल्मीको रेसुंगा माध्यमिक विद्यालय सम्मानित भए।

प्रज्ञापति गौतमी पदक तृतीय पदक महिला सशक्तीकरणमा योगदान गरेकी दाङकी पिमकुमारी गिरी र रोल्पाकी भागरथी घर्ती, दङ्गीशरण बलिहाँस पदक प्रथम बर्दियाका बेपत्ता नागरिक सगुनलाल चौधरी, मगर भाषामा विशिष्ठ योगदान गरेका दाङका जीतबहादुर थापा मगर (मरणोपरान्त) द्वितीय र दङ्गीशरण बलिहाँस पदक तृतीय बर्दियाका एकराज चौधरी, बाँकेका अब्दुल रहिफ सौफ, नवलपरासीका कौशलेन्द्र श्रीवास्तवलाई प्रदान गरिएको थियो। प्रदेश प्रमुख धर्मनाथ यादवले सो सम्मान प्रदान गरेका थिए।

सागका विजेता खेलाडी सम्मानित

कार्यक्रममा दक्षिण एसियाली खेलकुद (साग) प्रतियोगितामा विभिन्न विधाका खेलमा विजयी प्रदेशभित्रका उत्कृष्ट ४४ खेलाडीलाई समेत नगद तथा प्रमाणपत्रबाट सम्मान गरिएको थियो।

प्रदेश सरकारले १३ औं सागमा स्वर्ण रजत कास्य पदक विजेता ४४ जना खेलाडीलाई सम्मान गरेको थियो। तेक्वान्दोमा एकल र टिमबाट क्रमश स्वर्ण र कास्य विजेता अर्घाखाँचीका कमल श्रेष्ठले एक लाख २० हजार, भारोत्तलन ५९ बाँकेका स्वर्ण विजेता सञ्जु चौधरीलाई एक लाख, बक्सिङमा स्वर्ण पदक जीतेका झुपेन्द्र थापालाई एक लाख, कराते मा स्वर्ण विजेता सरु कार्की ८० हजार, रूपन्देहीका फुटबल खेलाडी स्वर्ण नितिन थापालाई ८० सहित सम्मान गरिएको थियो।

त्यसैगरी जुडोमा रजत र कास्य पदक विजेता निर्मला घर्तीमगरलाई एक लाख १० हजार, ट्रायाथोलन टिम र एकल रजत र कास्य पदक विजेता वसन्त थारुलाई ९० हजारसहित प्रमाणपत्रले मुख्यमन्त्री शंकर पोखरेलले सम्मान गरे।

उसुका रजत विश्व बुढामगर, मंगलप्रसाद थारू किरण आले र कुस्तीकी सुशीला चन्द ८० हजार नगदसहित सम्मानित भएका छन्।

महिला फुटवलमा रजत विजेता निरु थापा, महिला खोखोकी रजत विजेता निर्मल गिरी, पुनम थारु, दीपा विश्वकर्मा, अञ्जली थापा, आशा थारु, करिस्माकुमारी बोगटीलाई जनही ६० हजार रूपैयाँ नगदसहित सम्मान गरिएको छ।

महिला ह्यान्डबलमा रजत पदक विजेता सुमित्रा चौधरी, रामकुमार चौधरी, अर्चना न्यौपाने, कल्पना वलीले ६० हजार रूपैयाँ प्राप्त गरेका छन्।
ट्रयाथोलनमा रजत विजेता कल्पना वली, दिपेश चौधरी, हुमी बुढामगर, फुटबलकी पूजा राना, फेन्सिङकी गोमा आचार्यले पनि नगद ६० हजार रूपैयाँ पाएका छन्। यस्तै, कास्य पदक विजेतामध्ये करातेकी मनिषा चौधरी, जुडोकी सोनिया भट्ट, दीपा गुरुङ तेक्वान्दोका गोविन्द आले र प्रकाश केसीले ६० हजारसहित सम्मान पाएका छन्।

कास्य पदक विजेता प्रकाश केसी, अर्जुनकुमार वागचन्द, मीनप्रसाद गौचन, रोहित पौडेल अभिनाश बोहरा, कुशल भुर्तेल, सोमपाल कामी, सीताराना मगर, इन्दु बर्मा, धनबहादुर चौधरी, गोपिप्रसाद तिमिल्सेना, भरत सारु, तिलक सिञ्जाली, गौरव कायाले जनही ४० हजार रूपैयाँ नगदसहित सम्मानित भएका छन्।

रासस

प्रतिक्रिया दिनुहोस्