काठमाडौं– विवादको भूमरीमा फसेको विवेकशील साझा पार्टीका अध्यक्ष रवीन्द्र मिश्र र संयोजक मिलन पाण्डेले बोलाएको केन्द्रीय समितिको बैठक अलग–अलग आज बस्ने भएको छ।
केन्द्रीय समिति बैठकका एजेन्डा तय गर्ने विषयमा कुरा नमिलेपछि बेग्लाबेग्लै बैठक राखिएको हो। अध्यक्ष मिश्रले डाकेको बैठक आज मध्यान्ह १२–३० बजे बैठक राखिएको छ भने भने संयोजक पाण्डेले आज बिहान ११ बजे नै बैठक डाकेका छन्।
अध्यक्ष मिश्रले संघीयता खारेजी र धर्म निरपेक्षतामा जनमत संग्रहको प्रस्ताव अगाडि सारेपछि सो दलभित्र संयोजक पाण्डेलगायत चार नेताले फरक मत राखिरहेका छन्। पाण्डेको समूहले यसअघिका आन्दोलनका उपलव्धी र शासकिय प्रणालीप्रति विश्वास राख्दै मौजुदा संविधानका पक्षमा मत राख्दै आइहेका छन्।
आज राखिएका अध्यक्ष र संयोजकका अलग अलग बैठक भर्चुअल रूपमा हुनेछन्।
केन्द्रीय समिति बैठक हुनुभन्दा एक दिन अगाडि बुधबार अध्यक्ष मिश्र र संयोजक पाण्डेबीच इमेलमा जुहारी चलेको थियो। एकअर्कामाथि उठाइएका प्रश्नबारे उनीहरूले इमेलमार्फत् प्रष्टाउन खोजेका थिए।
‘यो अवस्थामा पार्टी एक भएर जाने अवस्था छैन’, बैठक अघि विवेकशील साझाका एक केन्द्रिय सदस्यले नेपाल समयसँग भने, ‘अब फेरि अलग नभइ सुख्खै छैन। एजेन्डा नै फरक परेपछि काम गर्न गाह्रो छ।’