काठमाडौं– बाग्लुङको बडिगाड गाउँपालिका-७ मा केही बेरअघि जिप दुर्घटना हुँदा एकै खलकका १४ जनाको मृत्यु भएको छ।
गुल्मीकाे इस्मा गाउँपालिकाबाट बाग्लुङकाे निसीखोलातर्फ जाँदै गरेको ग१ज ५२१९ नम्बरको जिप बडिगाड खोलामा खस्दा कार्की खलकका १४ जनाको घटनास्थलमै मृत्यु भएको जिल्ला प्रहरी कार्यालय बाग्लुङका प्रहरी प्रमुख एसपी नवराज भट्टले जानकारी दिए।
मृतकको सनाखत हुन नसकेको उनले बताए। जिपमा चढेका सबै कुलपूजा गर्न निसीखाेलातर्फ जाँदै थिए।
दुर्घटनामा तीन जना घाइते भएका छन्। घाइतेको अवस्था गम्भीर छ। उनीहरुको स्थानीय स्वास्थ्य सस्थामा उपचार हुन नसकेपछि अन्यत्र पठाउन हेलिकप्टर मगाइएको वडाध्यक्ष कृष्ण गुरुङले बताए।
जिपमा १८ सवार थिए। दुर्घटनाकाे कारणबारे अनुसन्धान भइरहेको प्रहरीले जनाएको छ।