शनिबार, फागुन १७, २०७६

समाचार

प्रदेश २ सरकारले आफ्नै बस सञ्चालन गर्ने

प्रदेश २ सरकारले आफ्नै बस सञ्चालन गर्ने

जनकपुरधाम – प्रदेश सरकाले आफ्नै बस सञ्चालन गर्ने भएको छ। प्रदेश २ को पूर्वदेखि पश्चिमसम्म प्रदेश सरकारले पाँचवटा बस सञ्चालन गर्ने तयारी गरेको हो।

प्रदेश सरकारका भौतिक पूर्वाधारमन्त्री जितेन्द्र सोनलले मन्त्रालयको प्रगति विवरणबारे जानकारी दिन शुक्रबार आयोजना गरेको पत्रकार सम्मेलनमा प्रदेश सरकारले तत्काल पाँचवटा बस सञ्चालन गर्ने तयारी गरेको जानकारी दिए। पहिलो चरणमा बस सञ्चालन गर्न टेन्डर प्रक्रिया अन्तिम चरणमा रहेको उनको भनाइ छ।

‘टेन्डर प्रक्रिया अन्तिम चरणमा पुगिसकेको छ, केही दिनभित्रै टेन्डर निकाल्ने तयारीमा हामी छौं, यो प्रक्रिया पूरा भएलगत्तै प्रदेश सरकारले आफ्नै बस सञ्चालन गर्नेछ,’ सोनलले भने। मन्त्री सोनलले पहिलो चरणमा जनकपुरदेखि पूर्व राजविराज र पश्चिम वीरगंजसम्म तथा वीरगंजदेखि राजविराजसम्म बस सञ्चालन हुने बताए। प्रशासनिक कामका लागि जनकपुर पुग्नेहरुको समस्यालाई मध्यनजर गरी प्रदेश सरकारले यस्तो योजना ल्याएको उनको भनाइ छ। काठमाडौंमा सञ्चालन भइरहेको साझा बसअनुसारकै बस खरिद गर्ने तयारी रहेको उनले बताए।

प्रदेश सरकारले दुई वर्षको कार्यकाल पूरा गरेपनि पूर्ण रुपले एक आर्थिक वर्षमात्र काम गर्न सकेको सोनलले बताए। यस अवधिमा मन्त्रालयले १ हजार १ सय ३ किलोमिटर सडक निर्माण गरेको जसमध्ये पक्की र ग्राभेल ३७५ र कच्ची सडक ७२७ किलोमिटर रहेको उनले जानकारी दिए।

यसैगरी प्रदेश लोकमार्गअन्तर्गत मन्त्रालयले आगामी दिनमा सडक निर्माण गर्न लागेको योजना सोनलले सार्वजनिक गरेका छन्। संघीय सरकारको रणनीतिक सडक सञ्जालमा नपरेका सडक, राष्ट्रिय लोकमार्गबाट जिल्ला सदरमुकाम जोड्ने सडक, प्रदेशभित्र एक जिल्ला सदरमुकामबाट अर्को जिल्ला सदरमुकाम जोड्ने सडक र दुई राष्ट्रिय लोकमार्ग जोड्ने सडक निर्माण गर्ने मन्त्रालयले तयारी गरेको सोनलले उल्लेख गरे।

राष्ट्रिय लोकमार्ग वा प्रादेशिक लोकमार्गबाट स्थानीय तहको केन्द्र जोड्ने, जिल्ला सदुरमुकामबाट स्थानीय तहको केन्द्र जोड्ने, दुई वा दुईभन्दा बढी स्थानीय तह र राष्ट्रिय लोकमार्ग वा प्रदेश लोकमार्गबाट धार्मिक, ऐतिहासिक तथा पर्यटकीय महत्वका स्थलहरु जोडने सडक निर्माण कार्य मन्त्रालयले सुरु गर्ने सोनलले बताए। यी सडकहरु निर्माण गर्न डीपीआर कार्यसमेत सुरु भइसकेको उनले जानकारी दिए।

प्रतिक्रिया दिनुहोस्