शनिबार, फागुन १७, २०७६

समाचार
दुर्घटनामा ६ को मृत्यु
null

काठमाडौं– देशका विभिन्न ठाउँमा भएका सवारी दुर्घटनामा परी ६ जनाको ज्यान गएको छ।

प्रहरीका अनुसार कैलालीको गौरीगंगा नगरपालिका–६ वनभेडास्थित पूर्वपश्चिम राजमार्गमा टिपरले ठक्कर दिँदा घोडाघोडी नगरपालिका–४ रामशिखरझालाका २८ वर्षीय भुवन चन्दको मृत्यु भएको हो।

ना१क ८८०३ नम्बरको टिपरले विपरीत दिशामा गुडिरहेको से७प ३९०७ नम्बरको मोटरसाइकललाई ठक्कर दिँदा मोटरसाइकल चालकको मृत्यु भएको जिल्ला प्रहरी कार्यालय कैलालीका प्रहरी प्रवक्ता प्रहरी नायब उपरीक्षक दक्ष बस्नेतले जानकारी दिए।

गम्भीर घाइते चन्दलाई उपचारका लागि सेती प्रादेशिक अस्पताल धनगढी लग्दै गर्दा बाटोमै मृत्यु भएको थियो।
ठक्कर दिने चालकलाई टिपरसहित प्रहरीले नियन्त्रणमा लिएको छ।

कैलालीकै लम्कीचुहा नगरपालिका–५ चौरीस्थित सडकमा रोकी राखेको सुदूरपश्चिम प्रदेश ०१–००१ च २६६० नम्बरको पिकअप गाडीबाट खस्दा सोही ठाउँ बस्ने जनक चन्दका छोरा १८ महिनाको टेनिस चन्दको मृत्यु भएको छ।

गाडीमा पछाडि खेलिरहेको अवस्थामा खसेर गम्भीर घाइते भएका उनको स्थानीय लालरत्न अस्पताल लम्कीमा उपचारका क्रममा मृत्यु भएको हो।

सुनसरीको धरान उपमहानगरपालिका–५ ठिङगाबारीस्थित सडकमा किसान चोकबाट ठिङ्गाबारीतर्फ जाँदै गरेको को५त ७८४३ नम्बरको ट्याक्टरबाट लड्दा सोही ठाउँ बस्ने ४२ वर्षीय बुद्धराज लिम्बुको ज्यान गएको छ। ट्याक्टर चालक फरार छन्। 

काभ्रेको पनौती नगरपालिका–१० दाहालटारस्थित सडकमा बा२७प ९३४६ नम्बरको मोटरसाइकल अनियन्त्रित भई दुर्घटना हुँदा २१ वर्षीय सञ्जीव तामाङको घटनास्थलमै मृत्यु भएको छ।

कञ्चनपुर, पुनर्वास नगरपालिका–१० चकमेली पुल नजिक से६प१७११ नम्बरको मोटरसाइकल अनियन्त्रित भई दुर्घटना धनगढी उपमहानगरपालिका–११ का २३ वर्षीय शिवराज रानाको मृत्यु भएको छ।

गम्भीर घाइते मोटरसाइकल चालक रानाको प्रादेशिक अस्पताल धनगढीमा उपचारका क्रममा मृत्यु भएको हो। धादिङ बेनिघाटमा नम्बर नखुलेको सवारीसाधनले प्रदेश नम्बर ३–०२–०१४ प ३९८९ नम्बरको स्कुटरलाई ठक्कर दिँदा सोलखुम्बु मुग्ली गाउँपालिका–१ का २२ वर्षीय प्रकाश बस्नेतको ज्यान गएको छ।

दुर्घटनामा घाइते स्कुटरमा सवार काभ्रे खहरे पाँगु गाउँपालिका–८ का २४ वर्षीय सनिस थापाको शिक्षण अस्पताल महाराजगन्जमा उपचार भइरहेको छ।

प्रतिक्रिया दिनुहोस्