काठमाडौं- साविक विजेता भारतले १३ औं दक्षिण एसियाली खेलकुद प्रतियोगिता (साग)अन्तर्गत पुरुष भलिबलमा पनि फाइनलको यात्रा तय गरेको छ।
आइतबार बिहान भएको पहिलो सेमिफाइनलमा श्रीलंकालाई ३–१ सेटले पराजित गर्दै भारत फाइनल पुगेको हो। सुरुका दुई सेट लगातार जितेको भारतले तेस्रो सेट भने गुमाउन पुग्यो। भारतले पहिलो सेट २७–२५ र दोस्रो सेट २५–१९ ले जित्दा तेस्रो सेट २१–२५ले गुमाउन पुग्यो।
निकै प्रतिस्पर्धात्मक बनेको चौथो सेट भारतले २५–२१ ले आफ्नो पक्षमा पारेपछि खेल जितेको हो।
चौथो सेटमा दुवै टिमले १२–१२, १४–१४, १५–१५ र १६–१६ बराबरी खेल्दा खेल निकै प्रतिस्पर्धात्मक भए पनि श्रीलंका २१ अंकमै समेटियो।
यससँगै भारतले उपाधिका लागि बंगलादेश र पाकिस्तानको विजेता टोलीसँग प्रतिस्पर्धा गर्नेछ।
भारत महिला भलिबलमा पनि फाइनलमा प्रवेश गरिसकेको छ। महिला भलिबलमा भारतले उपाधिका लागि मंगलबार आयोजक नेपालसँग भिड्ने छ।