काठमाडौं- परराष्ट्र मन्त्रालय अन्तर्गत परराष्ट्र मामिला अध्ययन प्रतिस्ठानले दक्षिणी छिमेकी भारतसँगको सीमा विवादका विषयमा विज्ञहरुसँग छलफल गर्ने भएको छ।
प्रतिस्ठानले सीमाविद्, भूगोलविद्, अन्तर्राष्ट्रिय सम्बन्धविद्, कुटनीतिज्ञ, सुरक्षाविज्ञलगायत सरोकारवालाहरुसँग छलफल गर्न लागेको हो।
केही समयअघि भारतले नेपाली भूभागलाई समेटेर आफ्नो नयाँ नक्सा सार्वजनिक गरेपछि यसबारे नेपालमा चासो बढिरहेको छ। यसका साथै सीमा विवाद तत्काल समाधान गरी नेपाली भूभाग फिर्ता ल्याउन नागरिक स्तरबाट सरकारलाई दबाब बढाइएको छ।
परराष्ट्र मन्त्रालय अन्तर्गत अन्तर्राष्ट्रिय सम्बन्धबारे अध्ययन गर्ने यस प्रतिष्ठानले सरकारलाई सहयोग पुग्नेगरी सीमा विवादमा समाधान खोज्न विज्ञहरुसँग केही दिनमा अन्तक्र्रिया कार्यक्रम आयोजना गर्न लागेको हो।
भारतले हालै सार्वजनिक गरेको नयाँ नक्सामा नेपालको लिम्पियाधुरा, लिपुलेक तथा कालापानी क्षेत्रलाई समेटिएपछि नेपालमा व्यापक विरोध भइरहेको छ।
प्रतिष्ठानका एक उच्च अधिकारीका अनुसार सीमा विवादबारे विज्ञहरुसँग छलफल गर्ने र आवश्यक परेको खण्डमा सीमा रेखा अध्ययन नै थाल्नेगरी छलफल चलाउन थालेको हो।
भारतले सीमा मिचेर नयाँ नक्सा जारी गरेपछि सीमाविदहरु, पूर्वप्रशासकहरु, तत्कालीन जनगणनाका गणकहरु, अधिकारकर्मीहरु, स्थानीय बासिन्दालगायतले नेपाली भूभाग सबै समेटिने गरी नयाँ नक्सा नै सार्वजनिक गरेका छन्।
नयाँ नक्सा सार्वजनिक गर्दै उनीहरुले यसबारे सरकारले स्पष्ट अवधारणा सार्वजनिक गर्न र ठोस रणनितिक कदम चाल्नुपर्ने भन्दै दबाब दिँदै आएका छन्।