काठमाडौं। आगामी शनिबार हुन लागेको उपनिर्वाचनका लागि मौन अवधि सुरु हुनुअघि निर्वाचनमा होमिएका सबैजसो राजनीतिक दलले चुनावी सभा आयोजना गरेका छन् ।
नेकपाका अध्यक्ष पुष्पकमल दाहालले आज एकैदिन पोखरा, धरान र भक्तपुरमा आयोजना हुने सभालाई सम्बोधन गर्दैछन् ।
पोखरामा आयोजित सभालाई सम्बोधन गरेर उनी हेलिकप्टरमा धरान र त्यसपछि भक्तपुर फर्किने कार्यक्रम छ ।
पोखरामा दिउँसो दुई बजे आयोजित सभालाई सम्बोधन गर्दै प्रचण्डले कांग्रेस सभापति शेरबहादुर देउवाले टाडै झुटो बोलेको बताए ।
‘यहाँ विपक्षी दलका नेताहरुले गरेको भाषणले पनि हाम्रो विजय सुनिश्चित देखेको छु । देउवाजीले यहाँ पोखरामा ठाडै झेटो बोल्नुभो । हत्केलाले सूर्य छेक्न खोजेको नाटक गर्नुभो, विद्या भट्टराईको जित सुनिश्चित गरिदिनुभो,’ प्रचण्डले भने । देउवाको भाषणप्रति लक्षित गर्दै उनले थपे, ‘के गर्नेलाई भन्दा देख्नेलाई लाज भनेजस्तो मलाई त सुन्न पनि लाज लाग्यो ।’
कास्की–२ का कांग्रेस उम्मेदवार खेमराज पौडेललाई वृद्धाश्रम जाने उमेरमा भोट माग्न हिँडेको टिप्पणी प्रचण्डले गरे ।
‘हाम्रा प्रधानमन्त्रीलाई बिदा लिनुपर्छ भन्नेहरूले विचरा ७० वर्षका बूढालाई उम्मेदवार बनाएका छन् । देवघाटतिर जानुपर्ने मान्छेलाई, ध्यान र ज्ञान सिक्नुपर्ने मान्छेलाई आफू अघि सार्ने अनि ६५ वर्षको जवानलाई अब आराम गर्नुपर्छ भन्न मिल्छ त ? उनले भने ।