कञ्चनपुर- कञ्चनपुरमा कालापानी, लिपुलेक र लिम्पियाधुरा रक्षाका लागि हस्ताक्षर अभियान सुरु गरिएको छ।
सीमा रक्षाका लागि युवा जागरण अभियान, दार्चुलाले हस्ताक्षर अभियान सुरु गरेको हो।
‘युवा जागौं, देश बचाऔं’ भन्ने मूल नारासहित हस्ताक्षर अभियान सुरु गरिएको अभियान संयोजक मदन गिरीले बताए। “भारतले अतिक्रमण गरेको भूमि फिर्ताका लागि दबाब सिर्जना गर्न हस्ताक्षर अभियान सञ्चालन गरेका छौं,’ उनले भने, “संकलित हस्ताक्षर प्रधानमन्त्रीलाई बुझाउँछौं।”
मंगलबारदेखि सुरु भएको अभियानका क्रममा दस हजारभन्दा बढीले हस्ताक्षर गरेका छन्। अभियानमा शिक्षक, विद्यार्थी, स्थानीय बासिन्दा, नागरिक समाज, राजनीतिक दलका कार्यकर्ताले सहभागिता जनाएका छन्।
हस्ताक्षर अभियान सुदूरपश्चिमभर सञ्चालन गरिने बताइएको छ।
रासस