काठमाडौं– प्रधानमन्त्री केपी शर्मा ओलीको स्वास्थ्यमा निरन्तर सुधार देखिएको मनमोहन कार्डियोथोरासिक भास्कुलर तथा ट्रान्सप्लान्ट सेन्टरले जनाएकाे छ।
“विशेषज्ञ चिकित्सकहरूबाट शल्यक्रियापश्चात हाल सघन उपचारको सम्पूर्ण व्यवस्थासहित निरन्तर निगरानीमा राखिएको छ। सम्माननीयज्यूको स्वास्थ्यमा निरन्तर सुधार भइरहेको र उहाँ अहिले राम्रोसँग कुराकानी गर्न सक्ने अवस्थामा भएको व्यहोरा जानकारी गराइन्छ,” ट्रान्सप्लान्ट सेन्टरका कार्यकारी निर्देशक प्रा. डा. उत्तमकृष्ण श्रेष्ठद्वारा जारी विज्ञप्तिमा उल्लेख छ।
स्वास्थ्यमा समस्या देखिएपछि प्रधानमन्त्री ओली मंगलबार ट्रान्सप्लान्ट सेन्टरमा भर्ना भएका थिए। उनकाे ‘एपेन्डिसाइटिस’को शल्यक्रिया गरिएकाे थियाे।