चुनाव प्रचारप्रसारको आज अन्तिम दिन, कहाँ कसको चुनावी सभा ?

काठमाडौं– यही मंसिर १४ गते शनिबार हुन लागेको उपनिर्वाचनका लागि आज (बुधबार) प्रचारप्रसारको अन्तिम दिन हो । आज राति १२ बजेदेखि मौन अवधि सुरु हुने भएकाले उम्मेदवारहरु प्रचारप्रसारको अन्तिम दौडधुपमा छन् ।

विशेषगरी प्रतिनिधिसभातर्फ कास्की–२, प्रदेशसभातर्फ भक्तपुर–१ (ख), दाङ–३ (ख) र बागलुङ–२ (ख) तथा स्थानीय तहतर्फ धरान उपमहानगरपालिकामा दलहरु केन्द्रित भएका छन् ।

प्रचारप्रसारको अन्तिम दिन आज सबैजसो निर्वाचन क्षेत्रमा चुनावी सभाहरु हुँदैछन् ।

भक्तपुरमा हुने नेकपाको सभालाई अध्यक्ष पुष्पकमल दाहाल ‘प्रचण्ड’ ले सम्बोधन गर्ने कार्यक्रम रहेको नेकपा भक्तपुरका अध्यक्ष बचन देउजाले जानकारी दिए ।

प्रचण्ड आजै चुनावी सभालाई सम्बोधन गर्न धरान र पोखरा पनि पुग्ने बताइएको छ ।

चाँगुनारायण नगरपालिका–४ नारायणटारमा दिउँसो २ बजे हुने अन्तिम चुनावी सभामालाई नेकपाका स्थायी कमिटी सदस्य एवं पूर्वसभामुख सुवास नेम्वाङले पनि सम्बोधन गर्नेछन् । नेकपाले यो क्षेत्रमा डीपी ढकाललाई उम्मेदवार बनाएको छ ।

भक्तपुरमै कांग्रेसको सभालाई पार्टीका शीर्षनेताहरुले सम्बोधन गर्दैछन् । सोही सभालाई राप्रपा (संयुक्त) का अध्यक्ष पशुपतिशमशेर जबराले पनि सम्बोधन गर्ने कार्यक्रम रहेको छ । दिउँसो १ बजे यातु महादेवसँगैको हेलमेट डाँडामा अन्तिम चुनावी सभाको आयोजना गरिएको कांग्रेस भक्तपुरले जनाएको छ ।

उक्त क्षेत्रमा कांग्रेस र राप्रपा (संयुक्त) ले तालमेल गरेका छन् । राप्रपा (संयुक्त)ले कांग्रेस उम्मेदवार कृष्ण भडेललाई सघाउने सहमति भएको छ ।

राप्रपा (संयुक्त)का उम्मेदवार रामशरण लामिछानेको उम्मेदवारी खारेज भएपछि उसले कांग्रेसलाई सघाउन लागेको हो । लामिछानेको गएको प्रदेशसभा निर्वाचनमा समानुपातिकतर्फको बन्द सूचीमा भएको देखिएकाले उन उम्मेदवारी दर्ता बदर भएको हो ।

यता, नेमकिपाले पनि दिउँसो ३ बजे कमलविनायक भत्केको पाटीमा अन्तिम चुनावीसभा गर्ने भएको छ । उक्त चुनावीसभामा पार्टी अध्यक्ष नारायणमान बिजुक्छे, सचिव प्रेम सुवाललगायतले सम्बोधन गर्ने तय भएको नेमकिपाले जनाएको छ ।

तीनवटै दलले आफ्नो शक्ति प्रदर्शन गर्न गाउँगाउँबाट र्‍यालीसहित आएर सभा गर्ने र शीर्षस्थ नेताहरुले सम्बोधन गर्ने कार्यक्रम तय भएको बताइएको छ ।

कहाँ कहाँ हुँदैछ उपनिर्वाचन ?

आगामी शनिबार प्रतिनिधिसभा र प्रदेशसभा सदस्य तथा स्थानीय तहका विभिन्न पदाधिकारी गरी ५२ पदका लागि उपनिर्वाचन हुँदैछ ।

निर्वाचन आयोगका अनुसार एक प्रतिनिधिसभा सदस्य, तीन प्रदेशसभा सदस्य, एक उपमहानगरपालिका प्रमुख, तीन गाउँपालिका अध्यक्ष, एक उपाध्यक्ष र ४३ वडाध्यक्ष पदका लागि उपनिर्वाचन हुन लागेको हो ।

कास्की निर्वाचन क्षेत्र नं २ मा प्रतिनिधिसभा सदस्य तथा भक्तपुर निर्वाचन क्षेत्र नं १ को (क), बागलुङ निर्वाचन क्षेत्र नं २ को (ख) र दाङ निर्वाचन क्षेत्र नं ३ को (ख) मा प्रदेशसभा सदस्यका लागि उपनिर्वाचन हुनेछ । सम्बन्धित क्षेत्रका प्रतिनिधिसभा र प्रदेशसभा सदस्यका सदस्यको निधनका कारण ती क्षेत्रमा उपनिर्वाचन हुन लागेको हो ।

स्थानीय तहतर्फ सुनसरीको धरान उपमहानगरपालिकाको प्रमुख, पाँचथरको फाल्गुनन्द, सङ्खुवासभाको मकालु, महोत्तरीको पिपरा गाउँपालिकाका अध्यक्ष तथा हुम्लाको खार्पुनाथ गाउँपालिकाको उपाध्यक्ष पदका लागि उपचुनाव हुँदैछ ।