धनगढी - कैलालीको धनगढीमा मंसिर २२ देखि पुस २ गतेसम्म सुदूरपश्चिम महोत्सव हुने भएको छ।
प्रदेशको पर्यटन, कृषि, व्यापार, औद्योगिक सम्भावनाको प्रबद्र्धन तथा संस्कृति संरक्षण गर्ने उद्देश्यले कैलाली उद्योग वाणिज्य संघले महोत्सव आयोजना गर्न लागेको हो। संघीय प्रहरी इकाई कार्यालयको मैदानमा सञ्चालन हुने महोत्सवमा व्यापारिक, कृषि, रेस्टुरेन्टलगायत ३ सय स्टल रहने आयोजकले मंगलबार पत्रकार सम्मेलन गरी जानकारी दिएको छ।
२०६३ साल बाट निरन्तर हुँदै आएको महोत्सवले यस क्षेत्रको आर्थिक एवम् सामाजिक रुपान्तरण र सांस्कृतिक संरक्षणमा उल्लेख्य भुमिका निर्वाह गर्दै आएको आयोजकको दाबी छ।
यो वर्षको महोत्सव करिब तीन लाख दर्शकले अवलोकन गर्ने अपेक्षा गरिएको संघका अध्यक्ष पुष्पराज कुँवरले बताए। उनले यस वर्षको महोत्सवले स्थानीय उत्पादन र महिला उद्यमीहरुलाई प्रोत्साहन गर्ने नीति लिएको जानकारी दिए।
महोत्सव अवधिभर करिब एक करोड दुई लाख ४५ हजार रुपैयाँ बराबरको आर्थिक कारोबार हुने संघले जनाएको छ। यसैगरी, महोत्सव आयोजनाका लागि ६३ लाख ९० हजार रुपैयाँ खर्च हुने जनाइएको छ। महोत्सवको तयारी तिव्र रुपमा अगाडि बढाइएको संघका महासचिव ओम विष्टले बताए। महोत्सव प्रवेश टिकटबाट संकलित रकमको १० प्रतिशत रकम सामाजिक कार्यमा लगाइने आयोजकले जनाएको छ।
‘समृद्ध सुदूरपश्चिमका लागी आर्थिक समृद्धि’ भन्ने मुल नाराका साथ आयोजना हुने महोत्सवमा राष्ट्रिय तथा स्थानीय कलाकारको प्रस्तुती रहने छ। महोत्सवको सम्पूर्ण तयारीका लागि २६ उपसमिति गठन गरिएको संघका वरिष्ठ उपाध्यक्ष पुस्करराज ओझाले जानकारी दिए।