सोमबार, फागुन १२, २०७६

समाचार

कपिलवस्तुका मत्स्य विकास अधिकृतसहित ७ जनाविरुद्ध भ्रष्टाचार मुद्दा

कपिलवस्तुका मत्स्य विकास अधिकृतसहित ७ जनाविरुद्ध भ्रष्टाचार मुद्दा

काठमाडौं- भेटेरिनरी अस्पताल तथा पशु सेवा विज्ञ केन्द्र, कपिलवस्तुका मत्स्य विकास अधिकृत सुरेन्द्र प्रसाद भुजसहित ७ जनाविरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ।

शिवराज नगरपालिका–११ नव प्रगतिशील बहुउद्देश्यीय कृषक समूहका नाममा दुर्गा प्रसाद खनालले बाख्रापालन कार्यक्रमको लागि बिनियोजित बजेट कुनै काम नै नगरी भुक्तानी दिएको अभियोगमा अख्तियारले मुद्दा दायर गरेको हो।

कृषक समूहका अध्यक्ष दुर्गा प्रसाद खनाल र सचिव उमेश चौधरी, पशु चिकित्सक डा. रुप नारायण श्रेष्ठ, पशु विकास अधिकृत डा. सोहन गुप्ता र सुरेन्द्र प्रसाद भुज तथा ईन्जिनियर बिवेक कुमार गुप्ताले मिलेमतोमा ६ लाख रुपैयाँ हिनामिना गरेको अख्तियारले जनाएको छ।

उनीहरुले हुदै नभएको कामको स्थलगत निरीक्षण तथा नापजाँच गरेको भनी कार्य सम्पन्न मूल्याङ्कनको झुटो फाराम लगायतका कागजातहरु बनाएर उक्त रकम हिनामिना गरेका अनुसन्धानबाट खुलेको अख्तियारका प्रवक्ता प्रदीपकुमार कोइरालाले जानकारी दिए।

हरि ओम ईन्जिनियरिङ कन्सल्टेन्सीका ईन्जिनियर बिवेक कुमार गुप्ताले कार्य सम्पन्न मूल्याङ्कन फाराम, खर्चको तेरिज र भुक्तानी दिने बिललगायतका कागजातहरु नक्कली तयार गरी अध्यक्ष खनालसँग १० हजार लिएको अख्तियारले जनाएको छ।

ईन्जिनियर गुप्तालाई १० हजार र बाँकी पाँच जनालाई ६ लाखका दरले बिगो माग दाबी गरिएको छ।

यस्तै अभद्र व्यवहार मुद्दा पेशीमा राखी छिटो टुङ्गाईदिने भन्दै सेवाग्राहीबाट घुस लिएको ४ हजार सहित पक्राउ परेका जिल्ला प्रशासन कार्यालय सप्तरीका मुद्दा शाखामा कार्यरत कार्यालय सहयोगी (करार) केशव कुमार यादवविरुद्ध पनि मुद्दा दायर भएको छ।

प्रतिक्रिया दिनुहोस्