काठमाडौं । चिकित्सा शिक्षा सुधारका लागि पटकपटक अनशन गर्दै आएका डा. गोविन्द केसीले सरकारले तोकेको अल्टिमेटम सकिँदा पनि शुल्क फिर्ता नगर्ने मेडिकल कलेजमाथि फौजदारी मुद्दा चलाउन सरकारसँग माग गरेका छन् । साथै उनले ती कलेज तथा सञ्चालकको सम्पत्ति छानबिन गर्न पनि माग गरेका छन् ।
सोमबार विज्ञप्ति निकालेर डा. केसीले मेडिकल कलेजको सम्पत्ति राष्ट्रियकरणको प्रक्रिया सुरु गर्न आग्रह गरेका छन् ।
डा. केसीले शुल्क फिर्ता नगरेका कलेज सञ्चालकलाई तत्काल पक्राउ गरेर फौजदारी मुद्दा चलाउन माग गरेका छन् । उनले प्रधानमन्त्री केपी शर्मा ओली आफैंले सार्वजनिक रुपमा ठगी गर्नेलाई कारवाही गर्ने बताएको भए पनि ठगहरुका नाइके उनकै पार्टीका नेता तथा हितैषी भएका कारण केही गर्न नसकेको आरोप लगाएका छन् ।
सत्याग्रहको पछिल्लो चरण स्थगनमात्रै गरेको स्मरण गराउँदै डा. केसीले तत्काल विद्यार्थीहरुसँग अवैध रुपमा लिइएको शुल्क फिर्ता गर्ने लगायतका माग पूरा नभए सत्याग्रहसहितका आन्दोलनका कार्यक्रम घोषणा गर्ने चेतावनी पनि दिएका छन् ।