उपनिर्वाचनकाे दिन बिहान ५ देखि साँझ ७ बजेसम्म सवारीसाधन सञ्चालनमा रोक

काठमाडौं– यही मंसिर १४ गते शनिबार हुन लागेको उपनिर्वाचनलाई लक्षित गरी सो दिन बिहान ५ बजेदेखि साँझ ७ बजेसम्म पास नलिएका सवारीसाधन चलाउन रोक लगाइएको निर्वाचन आयोगले जनाएको छ। आयोगले आज सूचना जारी गर्दै प्रतिनिधिसभा, प्रदेशसभा र स्थानीय तहको उपनिर्वाचन हुने निर्वाचन क्षेत्रमा सवारीसाधन सञ्चालनमा रोक लगाइएको जनाएको छ।

राष्ट्रिय मानवअधिकार आयोग, संवैधानिक निकाय, कूटनीतिक नियोगका अवलोकनकर्ता, संयुक्त राष्ट्रसंघका नियोगहरु, निर्वाचन आयोगका विकास साझेदार संस्थाहरुले भने निर्वाचन आयोगबाट अनुमति लिएर सवारीसाधन चलाउन पाउनेछन्।

साथै उपनिर्वाचनका उमेदवार, सुरक्षाकर्मी, राष्ट्रिय पर्यवेक्षक, सञ्चारमाध्यम, विमानस्थल प्रयोजनका लागि सम्बन्धित जिल्लाका प्रमुख जिल्ला अधिकारीको कार्यालयबाट पास लिएर सवारीसाधन चलाउन सकिने आयोगले जनाएको छ।