मेडिकल कलेजको दादागिरी : कलेजभित्रै विद्यार्थीमाथि कुटपिट

काठमाडौं - सरकारले तोकेभन्दा बढी शुल्क उठाउने वीरगन्जको नेसनल मेडिकल कलेजमा आन्दोलित विद्यार्थी कलेजभित्रै कुटिएका छन्। शुल्क फिर्ताको माग गर्दै शुक्रबार साँझ कलेजअगाडि विरोध प्रदर्शन गर्ने क्रममा एमबिबिएस पहिलो वर्षका विद्यार्थी कुटिएका हुन्।

दिउँसो २ बजेदेखि ५ बजेसम्म धर्नामा बसेका उनीहरु धर्ना सकेर होस्टल जाने क्रममा कुटिएका पीडित विद्यार्थीले बताए। मेडिकल कलेजका प्रबन्ध निर्देशक बसरुदिन अन्सारीको इशारामा कलेजकै अग्रज विद्यार्थीहरुले आफूहरुलाई हातपात गरेको उनीहरुको आरोप छ।

केही विद्यार्थीलाई हातमा लिएर कलेज प्रशासनले योजनाबद्ध रुपमा आक्रमण गरेको पीडित विद्यार्थीले बताए। केही सिनियर विद्यार्थीले बिहीबार पनि उनीहरूलाई मध्यरातसम्म होस्टेल छिर्न दिएका थिएनन्।

एक महिनादेखि आन्दोलित नेसनलका विद्यार्थी पछिल्लो समय रिले अनसनमा छन्। सुरुमा सरकारी प्रशासन र बाउन्सर लगाएर आन्दोलन दबाउन लागेको कलेजले अहिले केही सिनियर विद्यार्थी प्रयोग गरेर दमन गर्न थालेको उनीहरूको गुनासो छ।