‘राइड थ्रु सिन्धुलीगढी’ मा २१० सहभागी

काठमाडौं– पर्यटनमन्त्री योगेश भट्टराईले राइड थ्रु सिन्धुलीगढी साइकल यात्रा विश्व साइकलयात्री पुष्कर शाहलाई नेपालको झण्डा हस्तान्तरण गरेर उद्घाटन गरेका छन्।।

समृद्ध सिन्धुली अभियानले हरेक वर्ष राइड थ्रु सिन्धुलीगढी आयोजना गर्दै आइरहेको छ । सो कार्यक्रमकी संयोजक दीपिका ज्ञवालीका अनुसार १७१ जना साइकलयात्री सहभागी छन् । त्यसमा पुरुष १ सय ५३ जना र महिला १८ जना हुनेछन् । यात्रामा सहयोगीसहित २ सय १० जना सहभागी हुनेछन् ।

यस वर्ष संयुक्त राष्ट्र संघ र व्रिटिस काउन्सिलले महिला साइकलयात्रीलाई प्रायोजन गरेकाले महिलाको संख्या उल्लेख्य भएको हो । संयुक्त राष्ट्र संघले १० जना र ब्रिटिस काउन्सिलले ५ जना महिला यात्रीको संपूर्ण खर्च बेहोर्ने भएको समृद्ध सिन्धुली अभियानका अध्यक्ष लीलानाथ घिमिरेले जानकारी दिए । संयुक्त राष्ट्र संघले लैङ्गिक विभेद विरुद्धको १६ दिने अभियानकै सन्दर्भ पारेर यात्रामा महिला सहभागिता बढाउन साइकल यात्रीलाई प्रायोजन गरेको हो । यस वर्ष मंसिर ९ गते (नोभेम्बर २५) देखि लैंगिक विभेदविरुद्धको अभियान सुरु हुँदैछ ।

राइड थ्रु सिन्धुलीगढी साइकल यात्रालाई विश्व साइकलयात्री पुस्कर शाह र अर्का यात्री देवेन्द्र बस्नेतले नेतृत्व गर्नेछन् । अभियन्ता हरिकृष्ण श्रेष्ठका अनुसार काठमाडौंको पशुपतिनाथ परिसरबाट सुरु हुने साइकल यात्रालाई बाटोमा पर्ने भक्तपुर, काभ्रे, सिन्धुली, महोत्तरी र धनुषा जिल्लाका स्थानीय तह, संघसंस्था, सेना, प्रहरी, विद्यालयहरुले साइकल यात्रीलाई खाजा, पानी, स्वास्थ्य शिविरलगायतको व्यवस्था गरेर भव्य स्वागत गर्ने तयारी गरेका छन् ।