पाँच जनाविरुद्ध विशेषमा मुद्दा

काठमाडौं – अख्तियार दुरुपयोग अनुसन्धान आयोगले पाँच जनाविरुद्ध विशेष अदालतमा मुद्दा दायर गरेको छ।

अख्तियारले साल्ट ट्रेडिङ कर्पोरेशन कार्यालय, विराटनगरका तीन कर्मचारी विरुद्ध रासायनिक मल बिक्रीवापतको १९ लाख सात हजार तीन सय ५० रुपैयाँ हिनामिना गरेको अभियोगमा मुद्दा दायर गरेको हो।

रासायनिक मल भण्डारण शाखाका इन्चार्ज दिलचन्द्र राई, असिस्टेण्ट खगेन्द्र बस्नेत र कर्पोरेसनका तत्कालीन कार्यालय प्रमुख नविनचन्द्र झाविरुद्ध अख्तियारले बुधबार मुद्दा दायर गरेको जानकारी दिएको छ।

अख्तियारले झा, राई र बस्नेतले पदीय दायित्व पूरा नगरी नेपाल सरकार वा सार्वजनिक संस्थालाई गैरकानूनी हानि पुर्‍याएको भन्दै १९ लाख सात हजार तीन सय ५० विगो मागदाबी गर्दै मुद्दा दायर गरेको जनाएको छ।

यस्तै अख्तियारले नवलपरासीस्थित जनता माध्यमिक विद्यालय सुक्रौलीका विद्यालय व्यवस्थापन समितिका तत्कालीन अध्यक्ष पूर्णवासी यादवले अध्यक्ष हुन भारतबाट नक्कली एस.एल.सी.को प्रमाणपत्र बनाई पेश गरेको तथा धनुषाको साविक लक्ष्मी निवास गाविसस्थित राष्ट्रिय प्राथमिक विद्यालयमा राहत कोटामा शिक्षिका पदमा कार्यरत संगीता कुमारी महतोले नक्कली अध्यापन अनुमति पत्र पेश गरि जागिर खाएको भन्दै उनीहरुविरुद्ध पनि विशेष अदालतमा मुद्दा दायर गरेको छ।