जनकपुरधाम- सिरहाको लहानबाट हराएको डिजल ट्यांकर धनुषामा बरामद भएको छ। प्रहरीले धनुषाको सपहीमा प्रहरीले ट्यांकर फेला पारेको हो।
जिल्ला प्रहरी कार्यालय धनुषाका प्रहरी उपरीक्षक शेखर खनालले क्षिरेश्वरनाथ नगरपालिका–१ स्थित राजदेवी मन्दिरनजिक रोकेर राखेको अवस्थामा ट्यांकर फेला परेको जानकारी दिए।
रित्तो अवस्थामा बरामद गरिएको ट्यांकर सिरहा प्रहरीलाई बुझाइएको छ।
अमलेखगन्ज डिपोबाट डिजेल बोकेर विराटनगरतर्फ गुडेको ना४ख ४१६३ नम्बरको ट्यांकर दुई दिनदेखि हराएको थियो। ट्यांकर चालक मंगलबार दिउँसो प्रहरीको सम्पर्कमा पुगेको थियो।
प्रहरी सम्पर्कमा पुगेका चालक रामदेश यादव र सहचालक उमेश यादवले आफूहरूलाई एक समूहले अपहरण गरी ट्यांकर भारततर्फ लगेको बताएका थिए। ट्यांकरमा २० हजार लिटर डिजेल थियो।
नेपाल आयल निगमले कब्जा गरिएको भनिएको ट्यांकर खोजी गर्न समिति गठन गरेको छ ।